Şəmkir Şahmat məktəbində Şahmat idman növü üzrə Şəmkir rayon birinciliyi keçirilmişdir

19 noyabr 2018-ci il tarixdə Şəmkir Şahmat məktəbində Azərbaycan Respublikası Gənclər və İdman Nazirliyinin, Təhsil Nazirliyinin, Milli Olimpiya Komitəsinin və Azərbaycan Məktəb İdmanları Federasiyasının birgə təsdiq etdiyi Əsasnaməyə uyğun olaraq  Şahmat   idman növü üzrə Şəmkir rayon birinciliyi keçirilmişdir. Rayon  birinciliyinin açılış mərasimində Şəmkir Rayon İcra Hakimiyyətinin məsul əməkdaşı Davud Süleymanov,  Şəmkir rayon Gənclər və İdman İdarəsinin rəisi Emin İsmayılov, UGİM-in direktoru Namiq Mahmudov, Şəmkir rayon Təhsil Şöbəsinin idman sahəsi üzrə metodisti Südabə Vəliyeva, UGİŞM-in direktoru Rasim Pənciyev iştirak etmişdir.

        Yarışın rəsmi açılış mərasimində çıxış edən Şəmkir Rayon İcra Hakimiyyətinin məsul əməkdaşı Davud Süleymanov  bildirmişdir ki, artıq Azərbaycan Respublikası Gənclər və İdman Nazirliyinin, Təhsil Nazirliyinin, Milli Olimpiya Komitəsinin və Azərbaycan Məktəb İdmanları Federasiyasının birgə təsdiq etdiyi Əsasnaməyə uyğun olaraq keçirilən atletika, voleybol,  basketbol və şahmat üzrə məktəbdaxili  və rayon birincilikləri keçirilmişdir. Keçirilmiş bu yarışlarda rayonun  78 orta məktəbini əhatə etmiş, rayon birinciliyində qalib gələn komandalar zona mərhələsində Şəmkir rayonunu təmsil etmək hüququ qazanmışdır.
           Çıxış edən Şəmkir rayon Gənclər və İdman İdarəsinin rəisi Emin İsmayılov yarış iştirakçılarına ölkədə və xüsusi ilə Şəmkir rayonunda aparılan Dövlət İdman Siyasətinin uğurlarından geniş bəhs etmişdir. Bildirmişdir ki, müstəqillik dövründə aparılmış uğurlu işlərin nəticəsidir ki, artıq Azərbaycan dünyada idman ölkəsi kimi tanınmaqdadır. 

Şəmkir rayon Təhsil Şöbəsinin idman sahəsi üzrə metodisti Südabə Vəliyeva yarış qaydaları barədə ətraflı məlumat vermişdir. Yekunda 1-ci yerə
Əhməd Cavad adına tam orta məktəb, 2-ci yerə Cahangir Rüstəmov adına  tam orta məktəb, 3-cü yerə Qaralar kənd tam orta məktəbi layiq görülmüşdür. Qalib gələn komanda Əhməd Cavad adına tam orta məktəb zona mərhələsinə vəsiqə qazanmışdır.