Tarix təkrarlanır: “Soyqırım” qətnaməsində yazılıb ki...

ABŞ Konqresinin Nümayəndələr Palatasının qondarma erməni soyqırımı və Türkiyəyə sanksiyaları ehtiva edən qərarı 1974-cü ildə Türkiyəyə tətbiq edilən saksiyaların eynidir.

Bu sözləri Axar.az-a açıqlamasında Avropa.info saytının baş redaktoru, politoloq Ruslan Bəşirli deyib. O bildirib ki, 1974 -cü ildə Türkiyə ABŞ-ın bütün təzyiqlərinə rəğmən Kipr Barış Hərəkatı həyata keçirmiş və kiprli türkləri soyqırımdan xilas etmişdi.

“İndi isə Türkiyə ABŞ və Avropanın bütün təzyiqlərinə rəğmən sərhədləri yaxınlığında bir terror dövləti qurulmasına izn vermədiyini ortaya qoydu və “Sülh çeşməsi” (Barış Pınarı) Hərəkatı ilə ilk mərhələdə terror karidorunu ortadan qaldırdı”.

Politoloqun sözlərinə görə, bu, əsasən, ABŞ, İsrail və Fransanı məmnun etmir:

“Çünki adı çəkilən dövlətlər bu ərazidə yaxın gələcəkdə bir terror dövlətinin, uzaq gələcəkdə isə “Böyük İsrail”in qurulmasını planlayırlar.

Türkiyənin bu əməliyyatı isə İngiltərəyə sərf edir. Çünki 20-ci əsrin əvvəllərində bölgənin xəritəsini ingilislər çəkib, Osmanlı torpaqlarında tarixdə olmayan Suriya və İraq adlı dövlət qurublar. İndi həmin xəritənin yenidən çəkilməsini istəmirlər”.

Politoloqun sözlərinə görə, bəzilərinin Nümayəndələr Palatasının Türkiyəyə yönəlik mürtəce qərarını “demokratiyaya” bağlamaq cəhdləri özünü göstərir:

“Guya ABŞ demokratiya üçün “dəli divanə olduğundan” Türkiyəni cəzalandırmaq istəyir.

Bu xəyal-nağılları buraxmaq lazımdır. Ən azından Nümayəndələr Palatasının qəbul etdiyi həmin mürtəce sənədi oxuyarkən mənzərə üzə çıxır. Həmin sənəddə açıq şəkildə yazılıb ki, qondarma erməni soyqırımının tanınması və sanksiyalar məsələsi Türkiyənin Suriyada PKK/YPG terror təşkilatına qarşı həyata keçirdiyi əməliyyatla bağlıdır. Adamlar özləri sənəddə terror təşkilatını müdafiə etdiklərini və Türkiyəyə qarşı bu səbəbdən sanksiya tətbiq etdiklərini yazırlar. Saxta erməni soyqırımı məsələsi Qərbdə hər zaman aprel aylarında qaldırılır. Çünki saxtakar ermənilər 24 apreli "soyqırım" günü elan ediblər. İndi, mən bilən, aprel ayı deyil, noyabrdır. Nə əcəb Nümayəndələr Palatası oktyabr-noyabr aylarında qaldırır bu qondarma məsələni? Dediyim kimi, sənəddə bütün bu suallara cavab var. Həmin sənəddə açıq şəkildə həm saxta soyqırım qətnaməsinin, həm də sanksiyalar haqda qərarın Türkiyənin PKK-ya qarşı həyata keçirdiyi “Sülh çeşməsi” əməliyyatı ilə bağlı olduğu yazılıb. Hər şeyi adı ilə çağırmaq lazımdır”.