Tramp: "ABŞ İranın hər hücumuna 20 zərbə ilə cavab verməyə hazırdır"

"Amerika Birləşmiş Ştatları İran tərəfindən edilən hər bir hücuma qarşılıq olaraq 20 zərbə endirməyə tam hazırdır".

Ens.az Oxu.az-a istinadən xəbər verir ki, bu barədə ABŞ Prezidenti Donald Tramp Türkiyədə keçirilən NATO sammitindən sonra öz təyyarəsində jurnalistlərin suallarını cavablandırarkən deyib.

"Biz yenicə onlara (İrana) sarsıdıcı zərbə endirdik. Onlar üç gəmiyə hücum etdilər. Əgər onlar bizə bir zərbə vursalar, biz onlara 20 zərbə ilə cavab verəcəyik", - deyə Tramp vurğulayıb.

Bundan əvvəl ABŞ Silahlı Qüvvələrinin Mərkəzi Komandanlığı məlumat yaymışdı ki, Amerika hərbçiləri İslam Respublikasının Hörmüz boğazına nəzarət imkanlarını zəiflətmək məqsədilə İrana yenidən zərbələr endirməyə başlayıb. İyulun 8-də Tramp İranla atəşkəs rejiminin artıq qüvvədən düşdüyünü elan etmişdi.

Ağ Ev liderinə Vaşinqtonla Tehran arasında genişmiqyaslı münaqişənin yenidən başlayıb-başlamayacağı ilə bağlı sual da ünvanlanıb. O isə cavabında qısa olaraq "Bilmirəm" deyə cavab verib.

Bununla belə, ABŞ prezidenti hesab edir ki, irimiqyaslı hərbi əməliyyatlar bərpa olunarsa, ABŞ çox sürətlə qələbə qazanacaq.

ABŞ Prezidenti Donald Tramp həmçinin iddia edir ki, İran rəsmiləri mümkün razılaşma ilə bağlı Vaşinqtonla əlaqə saxlayıblar, lakin o, bu müqavilənin məqsədəuyğunluğuna şübhə ilə yanaşır.

"Onlar (İran) razılaşmanın əldə olunmasını çox istəyirlər. Bu yaxınlarda zəng etmişdilər, müqavilə istəyirlər. Mən sadəcə bilmirəm, onlar bu razılaşmaya layiqdirlərmi və buna əməl edəcəklərmi?" - deyə Tramp qeyd edib.