Türkiyə şirkətindən Azərbaycan helikopterləri ilə bağlı YENİ ADDIM

Türkiyənin "Canik" müdafiə sənayesi şirkəti Azərbaycan Hərbi-Hava Qüvvələrinin Mi-17 helikopterləri üçün yeni silah inteqrasiyası həyata keçirib.

Ens.Az xəbər verir ki, bu barədə "Haber Global" məlumat yayıb.

Şirkət 12.7×99 millimetrlik M3 ağır pulemyotunun helikopterlərdə istifadəsi üçün hazırladığı FALCON FLEX 50 sistemi ilə silah-platforma inteqrasiyası imkanlarını genişləndirir.

Məlumata görə, Azərbaycan Hərbi-Hava Qüvvələrinin Mi-17 helikopterləri üçün M3 FALCON pulemyotu və hava vasitələri üçün hazırlanmış FALCON FLEX 50 dayağının inteqrasiyası üzrə işlər aparılıb. Layihə çərçivəsində əvvəlcə Türkiyənin inventarındakı Mi-17 helikopteri araşdırılıb, daha sonra Azərbaycanda ilkin texniki işlər həyata keçirilib.

İnteqrasiya layihəsi başa çatdıqdan sonra ilk prototiplərin sınaqları Samsundakı müəssisədə simulyasiya edilib. Daha sonra Azərbaycanda uçuşa yararlılıq və atış sınaqları uğurla keçirilib.

Şirkət bildirib ki, sistemlər bu il Azərbaycan Hərbi-Hava Qüvvələrinə təhvil veriləcək. FALCON FLEX 50 helikopterlərin qapı, pəncərə və rampa hissələrinə uyğunlaşdırıla bilən modul silah dayağıdır.