Türkiyədəki aksiyalarda 1100-dən çox etirazçı saxlanıldı - 123 polis yaralandı

İstanbul Böyükşəhər Bələdiyyəsinin sədri Əkrəm İmamoğlunun həbsi ilə bağlı keçirilən etiraz aksiyalarında 1100-dən çox insan saxlanılıb, 123 polis əməkdaşı yaralanıb.

Ens.az Teleqraf.Az-a istinadən xəbər verir ki,bu barədə Türkiyənin Daxili İşlər Naziri Əli Yerlikaya məlumat verib.

"Aksiyalar zamanı 123 polis əməkdaşımız yaralanıb. Etirazçılardan molotof kokteyli, balta və bıçaq götürülüb. Polisə hücum edən, ictimai əmlaka ziyan vuran və xalqımızın təhlükəsizliyini təhdid edən şəxslərlə bağlı məhkəmə prosesləri davam edir. Saxlanılanlar arasında 12 müxtəlif terror təşkilatı ilə əlaqəsi olan şəxslər də var", - deyə nazir sosial şəbəkədə yazıb.

Yerlikaya əlavə edib ki, son günlər bəzi dairələr toplaşma və nümayiş hüququndan sui-istifadə edərək, ictimai asayişi pozmağa, küçə hadisələri törətməyə və polisə hücum etməyə çalışır:

"Saxlanılan şəxslərin əvvəlki cinayət dosyeləri araşdırılıb və onların narkotik, oğurluq, dələduzluq, cinsi təcavüz, sağlamlığa qəsdən zərər vurma da daxil olmaqla 17 müxtəlif cinayətlə əlaqəli olduqları müəyyən edilib".