Ukraynada nazir vaxt verdi, polis kazinolara qarşı hərəkətə keçdi

“Ukrayna Milli Polisi yaxın bir neçə saat ərzində ölkə ərazisində fəaliyyət göstərən bütün kazino və digər oyun məkanlarını bağlayacaq”. “Qafqazinfo” xəbər verir ki, bu barədə Ukrayna Daxili işlər naziri Arsen Avakov məlumat yayıb.

“Mən Milli Polisdən dekabrın 20-də (Bakı vaxtı ilə 18:00-a qədər) hökumətin qərarına əsasən qumar müəssisələrinin fəaliyyətini dayandırmasını tələb edirəm”, -deyə nazir bildirib.

Nazir qeyd edib ki, bu məsələ Ali Rada tərəfindən qəbul ediləcək xüsusi qanunla tənzimlənəcək. 

Milli Polis İdarəsinin sədri İqor Klimenko polisin əmri yerinə yetirməyə hazır olduğunu söyləyib.

Xatırladaq ki, Ukraynada qumar oyunlarına qadağa 2009-cu ildən, Viktor Yuşşenkonun prezidentliyindən bəri qüvvədədir. Sadəcə dövlət praktik olaraq ona nəzarəti itirib. Bu yaxınlarda Ukrayna hökuməti Radaya qumar oyunlarının leqallaşdırılması ilə bağlı qanun layihəsi təqdim edib. Hökumət başçısı Aleksey Qonçaruk qumar oyunlarının leqallaşdırılmasının iqtisadi təsirinin 2-2,5 milyard qrivna dəyərində olacağını açıqlayıb.