Xocalı şəhidinin anası: Ermənilərin törətdikləri soyqırımı cinayətlərinə görə cəzalarını alacaqlarına inanıram

Xocalı soyqırımı gec-tez dünyada tanınacaq, bu cinayəti törədənlər ədalət mühakiməsi qarşısında cavab verməli olacaqlar. Ermənilərin tezliklə cəzalarını alacaqlarına inanıram.

Bunu AZƏRTAC-a müsahibəsində şəhid Məzahir Əbilovun anası Qənirə Əbilova deyib.

Xocalı soyqırımının 27-ci ildönümü ilə əlaqədar Bakıda keçirilən ümumxalq yürüşündə iştirak edən Q.Əbilova bildirib ki, Xocalı şəhəri çətin vəziyyətdə olanda oğlu Məzahir Əbilov Xocalı Rayon Polis Şöbəsinin əməkdaşı işləyib və orada öz polis yoldaşları ilə birlikdə qarlı gecədə mühasirədə qalmış uşaqların, qadınların və yaşlı insanların xilas olunmasına kömək edərkən ermənilər tərəfindən öldürülüb.

O deyib ki, ermənilərin azərbaycanlılara qarşı soyqırımı cinayətlərinin cəzasız qalması, bu qətliama beynəlxalq aləmdə siyasi-hüquqi qiymətin verilməməsi ədalətsizlikdir.

Şəhid anası qəsbkar Ermənistanın tarixboyu heç zaman ona məxsus olmamış Azərbaycan torpaqlarını xoşluqla, ya da zor gücünə geri qaytarmağa məcbur olacağını, şəhidlərimizin qanının yerdə qalmayacağını bildirib.