Yaponiya parlamentinin növbəti sessiyası və hökumətin qarşısında duran vəzifələr

Oktyabrın 4-də Yaponiya parlamentinin növbədənkənar sessiyası öz işinə başlayıb. Bu dəfəki sessiyada diqqəti cəlb edən əsas məqamlardan biri Baş Nazir Şinzo Abenin yaxın illər üçün hökumətin qarşısında duran vəzifələrlə əlaqədar proqram xarakterli çıxışı olub.

AZƏRTAC xəbər verir ki, parlamentin internet kanalı vasitəsilə birbaşa yayımlanan çıxışında Baş Nazir diqqəti həm siyasi, həm sosial-iqtisadi və həm də beynəlxalq münasibətlər çərçivəsində hökumətin qarşısında duran vəzifələrə yönəldib.

Şinzo Abenin sözlərinə görə, güclü iqtisadiyyat ölkədə sabit sosial təminatın mövcudluğu üçün əsasdır. Yaponiyanın iqtisadi inkişafı üçün ən böyük təhlükə isə, ölkədə doğum səviyyəsinin sürətlə aşağı düşməsidir.

Baş Nazir qeyd edib ki, oktyabrın 1-də istehlak vergisinin 8 faizdən 10-dək qaldırılması nəticəsində əldə ediləcək vəsait sosial təminatın yaxşılaşdırılmasına, ödənişsiz məktəbəqədər təhsilin tətbiqinə və körpələrə qulluğun səviyyəsinin qaldırılmasına yönəldiləcək.

Ş.Abe, həmçinin qeyd edib ki, az miqdarda pensiya alan yaşlı insanlara əlavə vəsait ödəniləcək. İstehlak vergisinin artırılması, həmçinin sosial təminat sahəsində islahatları davam etdirməklə yanaşı, ehtiyacı olan bütün yaş qrupları üçün sosial qayğını yaxşılaşdırmağa şərait yaradacaq.

Dekabrın 9-dək davam edəcək 67 günlük sessiya zamanı müzakirəyə çıxarılacaq məsələlər sırasında hökumətin qabartdığı digər mühüm məsələ Konstitusiyaya dəyişikliklərlə bağlı müzakirələrin təşkili olacaq. Ş.Abe iyulda keçirilən son seçkilərdə əldə etdiyi üstünlükdən istifadə edərək bu məsələ ilə heç də razılaşmaq istəməyən müxalifətə üstün gəlməyi planlaşdırır.

Yaponiyanın yeni Reiva dövrünə qədəm qoymasını əsas gətirən Baş Nazir ölkənin gələcək simasının müəyyənləşməsinin zərurliyinə diqqət çəkərək bu məsələdə Konstitusiyanın xüsusi rolunu qabardır.

Paralmentdəki çıxışında da o, əsas diqqəti buna yönəldərək deyib: “Gəlin insanlar qarşısında olan məsuliyyətimizi axıradək icra edək”.

Xatırladaq ki, Ş.Abenin rəhbərlik etdiyi Liberal Demokratik Partiya (LDP) artıq uzun müddətdir 1947-ci ildə qüvvəyə minmiş pasifist Konstitusiyaya yenidən baxmağı təklif edir. Lakin nə LDP, nə də dəyişikliklərə tərəfdar olan digər partiyalar parlamentdə məsələyə baxmaq üçün lazım olan üçdəiki üstünlüyə malik deyillər.

Noyabrda Yaponiyanın ən uzun müddətə Baş Naziri olmaq statusunu qazanmaq üçün Ş.Abe ölkədə siyasi və iqtisadi sabitliyin saxlanmasına çalışır. Bu mənada dünyanın üçüncü iqtisadiyyatına malik olan ölkəsinin həmin cəhətləri onun siyasi çıxışında daha böyük təkidlə səslənib.

Daxili amillərlə xarici təsirləri ümumilikdə nəzərdən keçirən Baş Nazir istehlak vergisinin artımının yarada biləcəyi problemlərlə yanaşı, ABŞ ilə Çin arasında davam edən ticarət müharibəsini, Böyük Britaniyanın Avropa İttifaqından çıxmasını diqqətlə izləyəcəyini xüsusi vurğulayıb: “İqtisadiyyatın enişinin əyani şəkil aldığı müşahidə ediləcəyi təqdirdə biz çevik addımlar ataraq onun sabit inkişaf tempini saxlamağa çalışacağıq”.

Qeyd etmək lazımdır ki, Ş.Abenin ötən ay öz yeni kabinetini formalaşdırılmasından sonra keçirilən ilk sessiyada müxalif partiyaların ona qarşı sərt mövqeyi gözlənilir. Həm iqtisadi islahatlar, həm ABŞ ilə imzalanan ticarət müqaviləsi, həm də “Kansai Electric Power Co.” şirkətində maliyyə qalmaqalı fonunda ölkədəki nüvə siyasəti qarşıdakı debatların öz kəskinliyi ilə seçiləcəyini deməyə əsas verir.

Bununla yanaşı, həm Yaponiya Konstitusiyalı Demokratik Partiyasının, həm də “Xalq üçün demokratiya” Partiyasının daxil olduğu müxalifət qrupunun qarşısında duran əsas vəzifə onların hakim bloka qarşı davam gətirmək qabiliyyətində olduqlarını sübut etmələridir. Hökumət parlamentin cari sessiyasına 15 qanun layihəsinin təqdim etməyi planlaşdırır ki, Baş Nazir onları da əsasən “qazanılmış” adlandırıb.

Beynəlxalq siyasətə gəlincə isə, Ş.Abe bir daha Şimali Koreya lideri Kim Çen In ilə heç bir ilkin şərt olmadan görüşməyə hazır olduğunu bir daha təsdiq edib. Qeyd edək ki, bu, Şimali Koreya tərəfindən sualtı qayıqdan buraxılmış raketin Yaponiyanın məxsusi iqtisadi zonaya düşməsindən cəmi iki gün sonra baş verib.

Çin ilə əlaqələrə toxunan Baş Nazir bu ölkə ilə münasibtələri tamamilə yeni səviyyəyə qaldırmağa hazır olduqlarını bildirib. Cənubi Koreyaya gəlincə isə, o, bu ölkəni iki dövlət arasında əldə edilmiş razılaşmaya əməl etməyə çağırıb.

Öz çıxışında Yaponiya-ABŞ ittifaqının indiyə qədər heç vaxt olmadığı qədər möhkəmliyinə diqqət çəkən Baş nazir Rusiya ilə münasibətlərdə də qarşılıqlı çiçəklənməyə çalışdıqlarını vurğulayıb.

Göründüyü ki, qarşıdakı dövr Yaponiya hökuməti üçün həm siyasi, həm də sosial-iqtisadi sahədə bir sıra mühüm vəzifələrin həlli ilə diqqəti cəlb edir. Bu vəzifələrin həlli isə məhz hökumətin həyata keçirəcəyi siyasətin çevikliyindən və yerli əhali tərəfindən nə dərəcədə dəstəklənməsindən asılı olacaq.

Vüqar Ağayev

AZƏRTAC-ın xüsusi müxbiri

Tokio