II. Abdülhamid - Adana Katliamı/İngiliz Konsolosluğu'na sığınan üç Ermeni'nin hükûmete teslimlerinin sağlanması

Telgrafnâme
Mahrec Merkezi: Adana
Sevk Numarası: 459

Dahiliye Nezâret-i Celîlesi'ne

C. 16 Nisan sene 325. İngiltere Konsülatosu'na iltica eden Çalyan Karabet Hınçak ve Bezdikyan Zakar'ın Taşnaksiyun Komiteleri reisleri oldukları, Doktor Recebyan dahi Hınçak Komitesi azâsından ve ecânibin müdahalâtını celb ile burada bir Ermeni hükûmeti teşkili maksadıyla iğtişâş-ı vâkı‘ı tehyi’e ve tertib etmiş olan ihtilâlcilerin ileri gelenlerinden oldukları icra kılınmakda olan tahkikâtda ihbar olunduğu Polis Müdüriyeti ifadesiyle ma‘rûzdur.

Fî 18 Nisan sene 325

Vali
Mustafa

Bâb-ı Âlî
Daire-i Umûr-ı Dahiliye
Mektubî Kalemi

Müsta‘cel

Hariciye Nezâret-i Celîlesi'ne

Devletli efendim hazretleri

Adana İngiliz Konsülatosu'na üç Ermeni'nin iltica etdikleri sefâretden ifade kılınması üzerine merkûmların hüviyetleriyle oraya neden iltica etdiklerinin ve bir cürm ü cinayetleri olup olmadığının inbâsı hakkında sebk eden iş‘âra cevaben Adana Vilâyeti'nden alınan telgrafnâmede merkûmların Çalyan Karabet ve Bezdikyan Zakar ile Doktor Recebyan oldukları ve Adana İğtişâşâtı'nın mürettib ve müşevviklerinden bulundukları cihetle takibât-ı kanuniyeden kurtulmak için mezkûr konsülatoya iltica etdikleri bildirilmesine ve vak‘a-i elîme-i mezkûrede zî-medhal olanlar haklarında takibât-ı kanuniye icrası mukarrer ve lâ-büd bulunmasına binâen merkûmların da icra-yı muhakemeleri zımnında hükûmete hemen teslimleri için konsülatoya sefâretden emir verdirilmesi ve neticesinin inbâsı hususuna himem-i aliyye-i dâverîleri derkâr buyurulmak bâbında emr u fermân hazret-i men lehü'l-emrindir.

Fî 11 Rebîülâhir sene 327 ve fî 19 Nisan sene 325

Dahiliye Nâzırı nâmına
Müsteşar