Amerikalılar 1 milyon dolları olanı varlı saymır

ABŞ böyük imkanlar ölkəsidir. Təsadüfi deyil ki, dünyada ən çox milyarder bu dövlətdə yaşayır.

Bizimyol.info xəbər verir ki, amerikalılar 1 milyon dolları olanı varlı saymır. Sosial sorğu belə deməyə əsas verir. Fikri soruşulanların rəyinə görə, varlı adamın orta hesabla 2,3 milyon dolları olmalıdır.

Sorğuda 21-75 yaş arası min nəfər iştirak edib. Respondentlərin 35 faizi milyon dolları olanı varlılar siyahısına salıb. Amma daha çox yaşlılar belə düşünmədiyini bildirib. Yaşı 55-i keçmişlərin orta hesabla qiymətləndirməsi 2,6 milyon dollar olub.

Yaşlılar hesab edir ki, 1,1 milyon dollar sərvəti olana “hər şeyi var” demək mümkündür. Yaşı 22-yə çatmamışlar daha aşağı rəqəmlər söyləyib (orta hesabla 909 min dollar).Respondentlərin 50 faizi deyib ki, əlinə 1 milyon dollar düşsəydi, bunu daşınmaz əmlaka sərf edərdi. Xüsusilə orta nəsil bu düşüncədədir.

Hər dörd amerikalıdan üçü varlılığı məbləğlərə yox, həyat keyfiyyətinə bağladığını söyləyib. Onların 60 faizi yaxın 10 ildə varlanmağa ümid edir. Çoxunun fikrincə, varlanmaq üçün həm də sosial şəbəkələrdə az vaxt keçirmək lazımdır.Keçən il amerikalılar 2,4 milyon dolları olanı varlı adam sayırdı.