Facebook şirkətinin yeni ofisinə səyahət

İndiyə qədər ofislərindən edilən canlı yayımlarla mərkəzi ofisini tanıdığımız Facebook bu yaxınlarda Fremont 181 ilə icarə müqaviləsi bağladı. Bu ilin sonunda yekunlaşdırılacaq bu göydələn qarışıq həyat modeli ilə fərqlənir. İnşaat işləri yekunlaşandan sonra isə göydələnin ABŞ-ın qərbində ən hündür yaşayış yeri olacağı gözlənilir.

70 mərtəbədən ibarət olan binanın 33 mərtəbəsi Facebook və Instagram işçilərinin ixtiyarında olacaq. Yeri gəlmişkən, Facebook və Instagram işçilərinin ümumi sayının 2-3 min olduğu təxmin edilir.

İndiyə qədər Şimali Amerika, Latın Amerikası, Avropa, Yaxın Şərq, Afrika, Asiya, Şimali Sakit Okean kimi bölgələrdə bir çox ofis açmış olsa belə şirkətin San Fransiskoda yerləşən 40 min kvadrat metr sahəli yeni ofisində nələr edəcəyi indidən maraq doğurur.

Üstəlik verdiyi icarə haqqını nəzərə alsaq Facebook-un bu yeni məkan üçün böyük planları olmasını anlamaq olar.

Çünki şirkətin imzaladığı yeni icarə müqaviləsi son üç ildə San Fransiskoda icra olunmuş ən böyük icarə müqaviləsi statusunu aldı. Facebook-un 1 kvadrat metr sahəyə təxminən 80 dollar ödəyəcəyi təxmin edilsə də, şirkət bu barədə açıqlama verməyib.

Şirkət tərəfindən heç bir açıqlama verilməsinə baxmayaraq, Fremont 181 şəkil və dizaynı ilə gözü oxşayır.

Müəllif: Famil Ələkbərov