“Onun meyitini kabinetin qarşısında tapdım...” - ADNA hadisələrindən 11 il ötür

Azərbaycan Dövlət Neft Akademiyasında (indiki Azərbaycan Dövlət Neft və Sənaye Universiteti) baş verən terrordan 11 il ötür. 30 aprel 2009-cu ildə akademiyanın binasına daxil olan Gürcüstan vətəndaşı Fərda Qədirovun işçilərə və tələbələrə açdığı atəş nəticəsində 12 nəfər ölüb, 13 nəfər yaralanıb.

Hadisə yerinə gələn polis əməkdaşları tərəfindən mühasirəyə alınan cinayətkar intihar edib. İstintaqın gedişində müəyyən edilib ki, hücumun sifarişçisi Gürcüstan vətəndaşı Mardun Qumaşyan olub. Daha sonra o, İnterpol xətti ilə beynəlxalq axtarışa verilib.

Hücum qurbanları tələbələr, müəllimlər, təhsil ocağının mühafizəçisi, həmçinin yeməkxanaya süd məhsulları gətirən yaşlı bir qadın olub.

Terror hücumu qurbanlarının anım günündə Media.Az “İnterfaks Azərbaycan” xəbər agentliyinin baş direktoru və baş redaktoru, faciə qurbanlarından biri - Azərbaycan Dövlət Neft Akademiyasının (ADNA) laboratoriyasının müdiri Tamilla Əzizovanın oğlu Anar Əzizovla söhbət edib.

“Anam kafedranın qapısında öldürüldü. Səs-küyə çölə çıxmasaydı, güllə yan keçərdi. Təəssüf...", - deyə A.Əzizov bildirib.

Onun sözlərinə görə, hər şey səhər tezdən başlayıb:

“Mən işdə idim, birdən eşitdik ki, ADNA-da atışma var və xarici tələbələr yaralanıb. Bütün bunların hansı korpusda baş verdiyi hələ məlum deyildi və nə olduğunu soruşmaq üçün anama zəng elədim. Amma telefonu həmkarı götürdü və qısa danışdı. Sadəcə, anamın yaralandığını dedi.

Əlbəttə ki, dərhal hadisə yerinə getdim. Bina polislər tərəfindən bağlanmışdı, çoxlu sayda təcili yardım maşınları var idi. Məni qohum kimi binaya buraxdılar. Anamın kafedrasının harada olduğunu bildiyim üçün beşinci mərtəbəyə qalxdım. Ancaq təəssüf ki, mən onu sağ görmədim”.

O qeyd edib ki, beşinci mərtəbədə daha iki nəfəri güllələnmiş görüb:

“O zaman hiss etdiklərimi sözlə ifadə etmək çox çətindir. Sonradan bildim ki, ilk güllə anam üçün ölümcül olub. Ölümündən bir müddət əvvəl 58 yaşı tamam olmuşdu. Çox aktiv insan idi, buna görə dəhlizdə eşidilən səs-küyə görə otaqdan çıxması təəccüblü deyil. Morqda olanda ADNA hadisəsindəki qurbanların sayını öyrəndim. O günü xatırlayanda həmin dəhşətli mənzərə gözümün önündə canlanır”.

Mənbə: oxu.az