Tətilə çıxa bilməyənlərin 10 xüsusiyyəti

Artıq istirahət mövsümü başa çatmaqdadır. Hər zaman olduğu kimi, bu yay aylarında da istirahətə gedənlər qədər getməyənlər də oldu. Təbii ki, isti günlərdə istirahətə yollanmayanlar üçün müxtəlif səbəblər var. Amma həm də araşdırmalar göstərir ki, istirahət mövsümünü boşa verənlər müxtəlif maraqlı xüsusiyyətləri ilə diqqət çəkirlər. Beləliklə, tətilə çıxa bilməyənlərin 10 xüsusiyyətini təqdim edirik.

1) Yay fəslini sevmədiklərini tez-tez vurğulayarlar. Car çəkib deyərlər ki, dəniz qırağında günəş vannası qəbul etməkdənsə qışda sobanın qırağında kitab oxumaq daha maraqlıdır.

2) Tətilə çıxa bilməyən insanlar elə hesab edərlər ki, bu tətil vaxtını boşa xərcləməkdir; həm pulundan, həm də vaxtından olursan.

3) Guya tətildən daha vacib işlə məşğul olduqlarını iddia edərlər, ancaq dresskotu çimərlik paltarına məmnuniyyətlə dəyişərdilər. Və tətilə gedən qonşuları üçün darıxarlar.

4) Facebook və İnstaqramda tətil şəkilləri paylaşan dostlarına lağlağı şərhlər yazarlar, beləcə tətilə gedə bilməməyin acığını dostlarından çıxarlar.

5) Bu yay əldən çıxdığı üçün ümidlərini gələn yaya bağlayarlar və buna görə də cari ilin tez bitməsini istəyərlər.

6) Tez-tez tətil yuxuları görərlər; mavi dənizdə çimirlər, yaşıl meşədə, ağacların kölgəsində gəzirlər, kabab çəkirlər, samovar çayı içirlər.

7) İsti və bürküdə bayıra çıxmağın düzgün olmadığını bəhanə edərlər. Və dostlarında səhv axtararlar: “Bu istidə heç maşına minərlər?”, “Bu istidə o boyda yol gedəcəksiniz?”

8) Həyatın mənasını dünyanı gəzməkdə yox, filmə baxmaqda, kitab oxumaqda görərlər, ancaq tənbəllikdən heç birini eləməzlər və bütün günü darıxmaqla keçirərlər.

9) Hava buludlu, küləkli, yağışlı olanda sevinərlər ki, dostların tətili bada getdi, necə deyərlər, maya batdı.

10) Tez-tez internetdə tətil şəkilləri tapar, gizlin-gizlin o fotolara baxıb köks ötürərlər.

Mənbə: Gəncailə.az