Toyuğun içərisinə buz qoyub çəkidə aldadırlar?

Ötən gün sosial şəbəkədə "Mərcan" firmasına məxsus toyuğun içərisindən buz parçasının çıxması müzakirələrə səbəb olub. Bəziləri bunun çəkinin artırılması məqsədilə edildiyini düşünür. Lakin bir sual yaranır. Bu, həqiqətən buzdur, yoxsa başqa bir maddə?

Bəs, həqiqətən buz çəkinin artırılması məqsədilə edilib?

Məsələ ilə bağlı Redaktor.az "Mərcan" firması ilə əlaqə saxladı.

"Mərcan" istehsalçısı Azerbaijan Poultry Company-nin Marketinq şöbəsinin rəhbəri Günay Əkbər qeyd etdi ki, yazılanlar həqiqətə uyğun deyil.

"Belə ki, şəkildə göstərilən məhsul qırmızı paket soyudulmuş "Mərcan" toyuğudur. Soyudulmuş məhsulun içərisində buz olma ehtimalı sıfıra bərabərdir" - deyən Günay Əkbər əlavə etdi ki, "Mərcan" toyuqları su ilə kontaktda olmadan hava ilə soyudulur və ya dondurulu:

"Bu da onu göstərir ki, "Mərcan" məhsulunun içərisində su və ya buz ola bilməz. “Mərcan” məhsulları ilə əlaqədar sualı olan hər kəs qaynar xəttimizə və ya sosial media hesablarımıza müraciət edə bilərlər. Təsərrüfatımızı ziyarət etmək istəyənlərə isə qapımız hər zaman açıqdır",-deyə o, bildirdi.

Mövzu ilə bağlı Redaktor.az-a danışan Azad İstehlakçılar Birliyinin sədri Eyyub Hüseynovun sözlərinə görə, təəssüflər olsun ki, Qida Təhlükəsizliyi Agentliyi yalnız malların təhlükəsizliyini təmin edir.

Onun sözlərinə görə, keyfiyyət məsələsi uzun illər arxa planda qalıb:

"Lakin görürəm ki, yavaş-yavaş Qida Təhlükəsizliyi Agentliyi keyfiyyətə də nəzarət edir. Bu, çox yaxşı bir cəhətdir. Bu məsələ illər boyu ölkədə mövcuddur. İlk bunun simptomu altı il bundan öncə Ukraynadan gələn toyuqlarda müşahidə olundu. Biz iş apardıq və məlum oldu ki, toyuqların cəmdəyində 25 faizə qədər naməlum maye var. Hələ o mayenin özü nədir, o da bilinmir. Su olduğu da müəmma altında idi və bu məsələni biz bir neçə il təqib etdik. Ən nəhayət, Qida təhlükəsizliyi Agentliyi yeni yaranmışdı. O məsələni onlar da təqib etdi, təsdiq etdilər və qarşısı alındı. Lakin bu cür istehlakçıları çəkidə aldatma fəndi, istehsalçı şirkətlərin məşğul olduğu işlərdən biridir. Çox təəssüf ki, bu məsələ var. Bu, istehlakçı hüquqlarının pozulması kimi qiymətləndirilə bilər. Fikirmcə, bu kimi şirkətlər ciddi nəzarətə alınmalıdır ki, istehlakçının aldadılması baş verməsin. Həmin suyu ora qarışdırmaqla - əgər sudursa, digər maddə deyilsə, - əlbəttə, istehlakçı hüquqları pozulur, istehlakçılar çəkidə aldadılır. Ümumiyyətlə, istehlakçılar, çəkidə bir çox mallarda aldadılır. O cümlədən də bu cür toyuq satışında. Düşünürəm ki, Qida Təhlükəsizliyi Agentliyi, İqtisadiyyat Nazirliyi birgə iş aparmalıdır ki, bunun qarşısı alınsın".

Eyyub Hüseynov onu da vurğuladı ki, bu cür məsələlərdə həm Qida Təhlükəsizliyi Agentliyi, həm də İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti cavabdehdir.

Sözügedən məsələ ilə bağlı Qida Təhlükəsizliyi Agentliyinin mövqeyini də öyrənmək istədik.

Qurumun mətbuat katibi İlkin Kərimov bildirdi ki, bu məsələnin Qida Təhlükəsizliyi Agentliyinə aidiyyəti yoxdur:

"Çəki bizlik deyil, sırf iqtisadi məsələdir. AQTA qidanın təhlükəsizliyinə nəzarət edir. Buzdur, o da çəkini artırmaq üçün edilib, bizim predmet deyil
Qida məhsullarının çəkisində istehlakçıların aldadılması ilə bağlı məsələ qida təhlükəsizliyi predmeti olmadığı üçün bununla bağlı aidiyyəti üzrə müraciət etməyinizi xahiş edirik".

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətindən də məsələnin onlara aid olmadığı bildirildi: "Bu sualı daha yaxşı olar ki, Qida Təhlükəsizliyi Agentliyinə yönləndirəsiniz".

Göründüyü kimi, dövlət qurumları bu məsələnin onlara aidiyyəti olmadığını iddia edirlər. Bəs, o zaman qida təhlükəsizliyinə, onların çəkisinə kim nəzarət etməlidir?