"Mercedes-Benz"in Azərbaycandakı rəsmi dileri cərimələndi - MƏBLƏĞ

Yasamal Rayon Məhkəməsində "Mercedes-Benz" şirkətinin Azərbaycandakı rəsmi distribütoru "Avtokapital-Azərbaycan" MMC-nin barəsində tərtib edilmiş 2 cərimə protokoluna baxılıb.

Ens.az Pravda.az-a istinadən xəbər verir ki, hakimlər - Rəşad Cavadzadə və Murad Məmmədovun sədrliyi ilə ayrı-ayrı keçirilən proseslərdə qərarlar elan olunub.

Qərarlara əsasən, protokollar təmin edilib və şirkətə ayrı-ayrılıqda 1 500 manat (ümumilikdə 3 000 manat) məbləğində cərimə kəsilib.

Qeyd: "Avtokapital-Azərbaycan" MMC-nin barəsində Dövlət Gömrük Komitəsi tərəfindən İnzibati Xətalar Məcəlləsinin 485.2-ci (Mallar və nəqliyyat vasitələri gətirilərkən və ya aparılarkən müvafiq icra hakimiyyəti orqanına məlumatın verilməməsi və ya təhrif olunmuş məlumatın verilməsi, yaxud əvvəlcədən qısa idxal bəyannaməsinin verilməməsi) maddəsi ilə inzibati protokollar tərtib edilib. Daha sonra protokollar baxılması üçün Yasamal Rayon Məhkəməsinə göndərilib.

Xatırlatma: Bir müddət əvvəl MMC-dən mətbuata bildirilmişdi ki, uzun illər “Mercedes-Benz”in Azərbaycanda rəsmi distributoru olmaqla, işi son dərəcə şəffaf həyata keçirirlər: “Bu, çoxsaylı auditlər, o cümlədən xarici tərəfdaşlar tərəfindən öz təsdiqini tapıb”.