10 nəfərlik elektrik təyyarəsi uğurla sınaqdan keçirildi

Elektrik mühərriki ilə təchiz edilmiş on oturacaqlı pervanel Cessna Grand Caravan, ilk sınaq uçuşu zamanı Vaşinqton ştatında göydə yarım saat dövrə vurub. Bu müddət ərzində 6 dollar dəyərində elektrik enerjisi sərf edib. Bu təyyarə üçün elektrik mühərriki hazırlayan magniX menecerlərinin dediyinə görə 15 il sonra 1600 km-ə qədər olan bütün uçuşlar "təmiz" aviasiya ilə yerinə yetiriləcək.

Avstraliyadan olan magniX təyyarə istehsalçısı, həm yeni layihələr üçün, həm də məşhur populyar sərnişin modelləri Beechcraft King Air və Cessna 208 üçün elektriklə mühərriklər hazırlayır. Onlardan birini– Cessna Grand Caravan 208B – şirkət bu günlərdə hava nəqliyyatının sertifikatlaşdırılmasıyla məşğul olan AeroTEC şirkəti ilə birgə sınaqdan keçirdi.

Ens.az-ın verdiyi məlumata görə, təyyarə Vaşinqtonun Mozes- Leyk şəhərində yerləşən şirkətin hava limanından qalxaraq 30 dəqiqə dövrə vurub və eniş edib. MagniX-in icraçı direktoru Roi Qanzarski-nin sözlərinə görə, sınaq pilotu uçuşu "qüsursuz" adlandırıb.

Doqquz sərnişin və bir pilot üçün hazırlanan Cessna təyyarəsi 750 at gücündə Magni500 mühərrikindən istifadə edərək havaya qalxıb. Onun sürəti saatda 183 km, litium-ion batareyası hələlik 160 km uçuş üçün kifayət edir.

MagniX, lazımi sertifikatları aldıqda elektrik təyyarələrini 2021-ci ilin sonlarında satmağa başlaya biləcəyinə ümid edir. Şirkət, ucuz elektrik aviasiyası ilə canlandırıla bilən qonşu şəhərlər arasındakı hava əlaqələri üçün onun ideal olduğunu düşünür. Məsələn, yarım saatlıq uçuş üçün Magni500 motoru cəmi 6 dollar elektrik enerjisi "yandırdı". Batareyanın uçuşlar arasında 40 dəqiqə doldurulmasına ehtiyac olur.

Bununla belə, Qanzarski ümid edir ki, 1600 km-dən az olan bütün uçuşlar 15 il ərzində tam elektrikli olacaq.

İsrailin Eviation şirkəti ilə birlikdə, magniX, doqquz yerlik biznes jeti inkişaf etdirir. Alice təyyarəsi hər biri 375 at gücünə malik üç Magni250 mühərriki ilə təchiz ediləcəkdir. Bu, aviaşirkətin xərclərini 70% azaldacaq.

Mənbə: zen.yandex.az