ABŞ İrana qarşı sanksiyaları hər həftə sərtləşdirməyi planlaşdırır

ABŞ rəhbərliyi Tehrana təzyiqləri artırmaq məqsədilə İrana bağlı müxtəlif qurumlara qarşı hər həftə yeni sanksiyalar tətbiq etmək niyyətindədir.

Ens.az Oxu.az-a istinadən xəbər verir ki, bu barədə ABŞ-nin maliyyə naziri Skott Bessent "Reuters" agentliyinə müsahibəsində bildirib.

ABŞ tərəfindən tətbiq olunan məhdudiyyətləri nəzərdə tutan nazir "hər həftə onların sayının daha da artacağını görəcəksiniz", - deyə qeyd edib. O əlavə edib ki, prosesə banklardan başlanılır və onlara İran pullarını saxlamağın, eləcə də rejimə dəstək verməyin qəbuledilməz olduğu bildirilir.

S.Bessent onu da vurğulayıb ki, avqustun 31-dən sentyabrın 1-dək Eşvildə (Şimali Karolina ştatı) keçiriləcək Böyük İyirmiliyin (G20) ölkələrinin maliyyə nazirlərinin qarşıdan gələn görüşündə digər dövlətlərin nümayəndələrini Tehranla əlaqələrə görə sanksiyaların tətbiqi ehtimalı barədə xəbərdar edəcək.

Xatırladaq ki, avqustun 24-də Skott Bessent Vaşinqtonun İranın gəlir mənbələrini tamamilə kəsmək məqsədilə birtərəfli sanksiyalar rejimini kəskin şəkildə sərtləşdirdiyini elan etmişdi. Qurum rəhbəri iddia edib ki, Birləşmiş Ştatlar yeni anti-İran məhdudiyyətlərinə əməl etməkdən imtina edən istənilən ölkəyə qarşı ikinci dərəcəli sanksiyaların tətbiqinə hazırdır.