ABŞ Mərkəzi Kəşfiyyat İdarəsinin direktoru Kremli xəbərdar etmək üçün Moskvaya gedib

ABŞ Mərkəzi Kəşfiyyat İdarəsinin (MKİ) direktoru Con Retkliff Rusiya hakimiyyətini NATO ölkələrinə, xüsusən də Estoniya, Latviya və Litvaya hücum etməmək barədə xəbərdar etmək üçün Moskvaya səfər edib.

Ens.az Oxu.az-a istinadən xəbər verir ki, bu barədə "The Wall Street Journal" mənbələrə istinadən məlumat verib.

Retkliffin məhz kiminlə görüşdüyü isə bildirilmir.

"Görüş ilk növbədə Rusiyanı Baltikyanı ölkələrə qarşı istənilən eskalasiyaya qarşı xəbərdar etmək yönündə idi", - deyə mənbələrdən biri bildirib.

Qeyd edilir ki, Retkliff, həmçinin Moskvadan İrana hərbi və iqtisadi dəstəyi dayandırmağı tələb edib.

Xatırladaq ki, MKİ-nin direktoru Con Retkliff avqustun 25-də Moskvaya elan olunmamış səfər edib. O, ABŞ Hərbi Hava Qüvvələrinə məxsus "Boeing C-17" hərbi nəqliyyat təyyarəsi ilə uçub və təyyarə həmin gün səhər Vnukovo hava limanına eniş edib. Saat 19 radələrində Retkliffin gəldiyi ABŞ təyyarəsi Moskvadan əks istiqamətdə yola düşüb.

Kreml bildirib ki, Retkliff "xüsusi xidmət orqanları arasında əlaqələr" üçün səfər edib və Vladimir Putinlə görüşməyib. ABŞ Prezidenti Donald Tramp isə MKİ direktorunun Moskvaya "hansısa adi səbəbdən" getdiyini qeyd edib.