ABŞ-nin İranla növbəti danışıqlar mərhələsi üçün şərtləri açıqlandı

Tehran hökuməti 48 saat ərzində nüvə sazişi üçün ətraflı təklif təqdim edərsə, ABŞ İranla növbəti danışıqlar mərhələsinə keçməyə hazırdır.

Ens.az Oxu.az-a istinadən xəbər verir ki,bu barədə "Axios" ABŞ-nin yüksəkvəzifəli rəsmisinə istinadən məlumat yayıb.

Mənbə bildirib ki, İran layihə təklifi təqdim edərsə, ABŞ fevralın 27-də Cenevrədə ətraflı danışıqlara başlamaq və nüvə sazişinə nail olmaq üçün görüşməyə hazırdır".

Başqa bir mənbəyə görə, ABŞ və İran nüvə sazişi bağlanmazdan əvvəl görüşdə müvəqqəti razılaşmanı müzakirə edə bilərlər. Qeyd olunur ki, ABŞ prezidentinin xüsusi nümayəndəsi Stiv Uitkoff və Trampın kürəkəni Cared Kuşner də sözügedən danışıqlarda iştirak edəcəklər.

Xatırladaq ki, fevralın 17-də Omanın vasitəçiliyi ilə İran və ABŞ arasında aparılan danışıqların ikinci raundu başa çatıb. İranın xarici işlər naziri Abbas Əraqçı Tehran və Vaşinqtonun gələcək nüvə sazişinin bir neçə əsas bəndi üzrə razılığa gəldiyini açıqlayıb. Ağ Ev bəzi məsələlərdə fikir ayrılıqlarının hələ də qaldığını bildirib. Donald Tramp İrana sazişi bağlamaq üçün 10-15 gün vaxt verib.