Ağ Aşıq Allahverdi - Çətindi

Libasnan, duruşnan, boyun-buxunnan,
İnsanı tanıyıb, bilmək çətindi.
Qanannan, qanmaznan dolanmaq olar,
Yarımçığı başa salmaq çətindi.

Mətləbini söylə, mətləb qanana,
İşarə lazımdı arif olana,
Tərəqqidən tənəzzülə enənə,
“Bəh-bəh”-deyib, qəh-qəh gülmək çətindi.

Allahverdi işin yox fitnə, felnən,
İnsanı qarşıla şirin dilinən,
Ayrılma yoldaşdan, bir ol elinən,
El olmasa, tək ucalmaq çətindi.