Almaz Şarman: “Karantin rejiminin sərtləşdirilməsi qaçılmazdır”

Dünyada yoluxmaların artmasının əsas səbəbi olan COVID-19-un “delta” növü artıq Azərbaycanda da aşkarlanıb. Bəs bu hal görəsən nə dərəcədə ciddidir?

Ens.az Oxu.az-a istinadən xəbər verir ki, Tibb professoru, virusoloqiya və immunoloqiya üzrə mütəxəssis, Qazaxıstanın Profilaktik Tibb Akademiyasının prezidenti, hazırda ABŞ Sağlamlıq Assosiasiyasının üzvü Almaz Şarman Caliber.Az-a bununla bağlı münasibət bildirib.

Onun sözlərinə görə, bu variantın yayılması yoluxmanın sayını artıracaq.

“Reproduktiv say kimi bir anlayış var, əsas indeks “R” simvolu ilə qeyd olunur. Yəni yoluxmuş şəxs 5-8 nəfəri yoluxdura bilər. Ancaq karantin tədbirləri davam edərsə, infeksiya nisbəti 1,3 olacaqdır”.

Professor buna baxmayaraq epidemiyanın davam edəcəyini və yoluxmuş insanın başqalarını yoluxduramağa davam edəcəyini bildirib.

““Delta” - COVID-19-un olduqca kontaqioz variantıdır. Yeri gəlmişkən, bu bir ştamm deyil, variantdır. O, əvvəlkilərdən daha aqressivdir, eyni zamanda yaşlı insanlardan əlavə gənclərə də təsir etməsi ilə fərqlənir”.

Ekspertin sözlərinə görə, Azərbaycan üçün vaksinasiyanın olması yaxşı xəbərdir.

“Özü də iki dozada çox təsirli və yoluxmadan 85-90 faiz qoruyan “Pfizer” peyvəndi təklif olunur. Bununla yanaşı, digər peyvəndlər də xəstəliyin ağır formalarına qarşı kömək edir, mən Çin və Rusiya istehsalı olanları nəzərdə tuturam. ABŞ-da bir araşdırma aparılıb və vaksinasiyadan keçənlər arasında praktik olaraq koronavirusdan ölüm hallarının olmadığı məlum olub”.

Virusoloq anti-epidemioloji tədbirlərə riayət etməyə, maskalar taxmağa, sosial məsafəni qorumağa, kütləvi tədbirləri qadağan etməyə və təbii ki, vaksinasiyaya davam etməyi tövsiyə edib. Onun sözlərinə görə əhalinin ən azı 70 faizinə peyvənd vurulmalıdır.

Müsahib Azərbaycanda yoluxma sayında artım qeydə alındığını, bununla yanaşı COVID-19 “delta” variantının artıq ölkədə mövcudluğunu nəzərə alaraq karantin rejiminin sərtləşdirilməsinin qaçılmaz olduğunu hesab edib.

“Əgər əhalinin yarısından çoxu peyvənd vurdursaydı, karantin tədbirlərinin gücləndirilməsindən qaçmaq mümkün olardı. Ancaq hazırda fikrimcə sərtləşdirilməlidir və təbii ki, vaksinasiya prosesini sürətləndirmək lazımdır”, - Almaz Şarman sözlərini yekunlaşdırıb.