Aprel döyüşlərinin mütləq davamı olacaq — Deputatlar belə düşünür

“Aprel döyüşləri müasir Azərbaycan hərb tarixinin şanlı səhifələrindən biridir. Azərbaycan ordusu bir daha sübut etdi ki, işğal altında olan torpaqları qısa zamanda azad etməyə qadirdir”. Bunu “Ölkə.Az”a açıqlamasında millət vəkili Elman Məmmədov deyib. Onun sözlərinə görə,  bu gün Azərbaycan ordusu 2016-cı il aprel döyüşlərindən də daha yüksək və genişmiqyaslı uğrulu əməliyyatlar həyata keçirərək torpaqları işğaldan azad emtəyə qadir olduğunu nümayiş etdirdi. “Ancaq çox təəssüf ki, bu əməliyyatların davamı olmadı. Artıq aprel döyüşlərindən uzun müddət keçib. Bir Azəraycan vətəndaşı kimi arzu edirəm ki, aprel döyüşlərində Azərbaycan ordusu qazandığı  uğurları davam etdirərək işğal altında olan digər ərazilərimizi də işğaldan azad etsin. Çünki düşmən danışıq dilini başa düşmədiyindən onu məhv edib, torpaqlarımızı işğladan azad etməliyik. Ona görə ki, Ermənistan sülh danışıqlarına məhəl qoymadan işğalçı siyasətini davam etdirir. Sərhəddə atəşkəsi pozaraq  mütəmadi olaraq təxribatlar törədir. Elə son vaxtlarda Qazaxda  Azərbaycan-Ermənistan sərhəddində baş verənlər və digər cəbhə xəttində baş verənlər bunun bariz nümunəsidir. Ermənistan bununla da  işğalçılıq siyasətinə son vermək niyyətində olmadığını göstərir. Belə olan halda Azərbaycan ordusu 2016-cı ilin aprelində olduğu kimi daha genişmiqyaslı və yüksək səviyyədə hərbi əməliyyatlar həyata keçirib işğal altında olan torpaqları işğaldan azad etməlidir. Azərbaycan ordusu buna qadirdir”- millət vəkili bildirib. Millət vəkili Musa Qasımlı isə bildirib ki, 2016-cı ilin uğurlu Aprel döyüşləri hərb tariximizdə millətimizə qürur, özünəinam və yüksək vətənpərvərlik hissləri yaşatmış parlaq səhifələrdən biridir. “Davamı da mütləq gələcək və işğalçı torpaqlarımızdan qovulacaqdır. Millətimizin bağrından çıxan ordumuzla daim bir yerdəyik. Qəhrəmancasına həlak olmuş şəhidlərimizə Allahdan rəhmət diləyirəm. Şəhidlər ölməz! Millətimiz və dövlətimiz mövcud olduqca şəhidlərimiz də yaşayacaqdır! Tanrı uca millətimizi və müqəddəs dövlətimizi qorusun!”, - deyə, M.Qasımlı vurğulayıb.