Aşıq Şenlik - Günü-günə calasan da
Keçən günə günlər çatmaz
Günü-günə calasan da!
Dərdli adam gecə yatmaz,
Şirin layla çalasan da!
Öz dərdini özün üyüt,
Alma, heyva verməz söyüd.
Anlamazlar almaz öyüd –
Şahmar olub çalasan da.
Səfil Şenlik ağlar, gülməz,
Nanəciblər dostu bilməz.
Fani dünya sənə qalmaz,
Altun verib alasan da.
Məqaləni bəyəndiniz? Sosial şəbəkələrdə izləyin!
Şərhlər
Şərhləri göstər Şərhləri gizlət