Axios: ABŞ İsrailin Qəzza ilə bağlı razılaşmalara əməl edəcəyinə ümid edir

ABŞ administrasiyası İsrailin Qəzza zolağı ilə bağlı əldə olunan razılaşmalara əməl edəcəyini gözləyir.

Ens.az Report.az-a istinadən xəbər verir ki,bu barədə Axios və İsrailin 12-ci telekanalının müxbiri Barak Ravid ABŞ rəsmisinə istinadən X sosial şəbəkəsində məlumat yayıb.

Onun sözlərinə görə, Ağ Ev İsrailin Baş naziri Benyamin Netanyahunun Qəzza üzrə Sülh Şurasının 15 maddəlik planını rədd etməsi və HƏMAS tərksilah edilməyənədək qoşunlarını anklavdan çıxarmayacağı barədə açıqlamalarından narahat deyil.

Amerikalı rəsmi Netanyahunun mövqeyini oktyabrın 27-də keçiriləcək Knesset seçkiləri ilə əlaqələndirib. O bildirib ki, Vaşinqton İsrail baş nazirinin siyasi mülahizələrini anlayır, lakin Netanyahu ABŞ-ın tələblərinə, o cümlədən Qəzza zolağına endirilən zərbələri məhdudlaşdırmaq çağırışına əməl etməyə davam edir.

Ravidin məlumatına görə, Netanyahu ötən həftə ABŞ Prezidenti Donald Trampla və onun kürəkəni Cared Kuşnerlə telefon danışığı aparıb. Danışıq zamanı Netanyahu plana "şans verməyə" və demilitarizasiya prosesinə başlamaq üçün Qəzzaya zərbələri məhdudlaşdırmağa söz verib. ABŞ tərəfi hesab edir ki, İsrail baş naziri bu vədinə əməl edir.