Azərbaycanda ötən il yerli gəlirlər və xərclər proqnozu 10 % üstələyib

2025-ci ildə Azərbaycanda yerli gəlirlər proqnozla müqayisədə yüksək icra edilib, əksər mənbələr üzrə yerli gəlirlərə aid edilən vəsaitin müvafiq tədiyə növündəki xüsusi çəkisində azalma müşahidə olunub.

Ens.az Report.az-a istinadən xəbər verir ki,bu barədə Hesablama Palatasının "2025-ci il dövlət büdcəsinin icrası" haqqında qanun layihəsinə verdiyi Rəydə bildirilir.

Sənədə əsasən, hesabat ilində şəhər və rayonların yerli gəlirləri 873 milyon manat olub ki, bu da proqnozla müqayisədə 79,1 milyon manat və yaxud 10 %, 2024-cü illə müqayisədə 31,1 milyon manat və yaxud 3,7 % çoxdur. Yerli gəlirlərin icra səviyyəsi dövlət büdcəsi gəlirlərinin icra səviyyəsini (2,2 %) 7,8 faiz bəndi üstələyib.

Ötən il yerli gəlirlərin tərkibində mal, iş və xidmətlərə görə əlavə dəyər vergisi (32,4 %), hüquqi şəxslərin mənfəət vergisi (25,5 %) və fiziki şəxslərin gəlir vergisi (24,7 %), ölkədə istehsal olunan məhsullar üzrə aksiz (6,1 %) üzrə daxilolmalar üstünlük təşkil edib. Hesabat ilində müvafiq tədiyə növündə yerli mənbələrin xüsusi çəkisi əksər tədiyə növləri üzrə azalmış və 3,2-13,3 % aralığında dəyişib.

Bundan başqa, 2025-ci ildə Azərbaycanda şəhər və rayonların yerli xərcləri 717,2 milyon manat təşkil edib ki, bu da proqnozlaşdırılmış məbləğdən 10,3 %, əvvəlki ilin icra göstəricisindən isə 2,9 % azdır. Dövlət büdcəsinin icrasına dair illik hesabatda əvvəlki ildə olduğu kimi, yerli xərclərin proqnoza nisbətən az icrası əsasən yerli icra hakimiyyəti orqanlarında mövcud olan boş (vakant) ştatlar, eyni

zamanda dövlət qulluğuna yeni təyin olunmuş işçilərin qulluq stajlarının və ixtisas dərəcələrinin az olması, mənzil və kommunal təsərrüfatı sahəsi, o cümlədən abadlaşdırma, tullantıların yığılması, emalı və təmizlənməsi, küçə və parkların işıqlandırılması, yaşıllıqların salınması və digər abadlıq işlərinin yerinə yetirilməsi ilə bağlı xərclər üzrə qənaətin yaranması ilə əlaqələndirilib.

Təqdim edilmiş məlumatlara əsasən, icra edilmiş yerli xərclərin funksional təsnifat üzrə bölgüsündə "Ətraf mühitin mühafizəsi" (35,3 %), "Ümumi dövlət xidmətləri" (28,3 %) və "Mənzil və kommunal təsərrüfatı" (25,2 %) bölmələri daha yüksək xüsusi çəkiyə malik olmuşdur. İqtisadi təsnifat üzrə isə yerli xərclərdə malların (işlərin və xidmətin) satınalınması (53,6 %), əməyin ödənişi (26,6 %) və qeyri-maliyyə aktivləri (15 %) xərcləri daha böyük pay təşkil edib.