AzerTelecom İlin Telekommunikasiya şirkəti seçildi

Azərbaycanı beynəlxalq internet şəbəkəsinə bağlayan magistral (backbone) internet provayderi “AzerTelecom” şirkəti “9-cu Beynəlxalq Caspian Energy Forum Baku 2019” tədbirində “Caspian Energy Award” mükafatına və “İlin Telekommunikasiya şirkəti” adına layiq görülüb.

“Qafqazinfo” xəbər verir ki, “Əsrin müqaviləsi”nin imzalanmasının 25 illiyi, “Caspian Energy” jurnalının fəaliyyətinin isə 20 illik yubileyinə həsr olunmuş “Beynəlxalq Caspian Energy Forum 2019” tədbiri dövlət və özəl sektorun, nüfuzlu regional və beynəlxalq təşkilatlardan olan çoxsaylı nümayəndələrin iştirakı ilə baş tutub.

Forumda İKT, aqrosənaye və turizm mövzularına həsr olunmuş panel müzakirəsində “AzerTelecom” şirkətinin baş direktoru Fuad Allahverdiyev məruzəçi qismində çıxış edərək şirkət tərəfindən Azərbaycanın Rəqəmsal Mərkəzə çevrilməsi üçün həyata keçirilən “Azerbaijan Digital HUB” proqramı və bu proqram çərçivəsində icra olunan iri infrastruktur layihələrindən bəhs edib. “25 il əvvəl ümummilli lider Heydər Əliyevin rəhbərliyi altında “Əsrin müqaviləsi”nin imzalanması Azərbaycanı enerji mərkəzi etdi. Hazırda bu konsepsiyanın davamı olaraq “AzerTelecom” şirkəti ölkəmizin həm də rəqəmsal mərkəz olması üçün “Digital HUB” proqramını icra edir”- deyə Fuad Allahverdiyev bildirib. O “Digital HUB” proqramının 3 mərhələdən ibarət olduğunu və bu mərhələlərin hər birinin icrasının ölkənin təkcə İKT sektorunun deyil, ümumilikdə iqtisadiyyatın müxtəlif sahələrinin inkişafına, onun rəqəmsallaşmasına və rəqəmsal iqtisadiyyat quruculuğu proseslərinə mühüm töhfə verəcəyini qeyd edib. Fuad Allahverdiyev proqram çərçivəsində Avropa ilə Asiya arasında Azərbaycandan keçəcək rəqəmsal telekommunikasiya dəhlizinin (Rəqəmsal İpək Yolu) formalaşması, Azərbaycanla Orta Asiya ölkələri arasında Xəzər dənizinin dibi ilə “Transxəzər magistralı” fiber-optik kabel xəttinin çəkilişi layihəsinin detalları, ölkə daxilində magistral infrastruktur quruculuğu istiqamətində “Azərbaycan Dəmir Yolları” QSC ilə birgə icra edilən layihələr barəsində danışıb.

Forumda “AzerTelecom” şirkətinə Azərbaycan iqtisadiyyatının inkişafına xüsusi töhfə vermiş şirkət olaraq “Beynəlxalq Caspian Energy Award” mükafatı təqdim edilib, “AzerTelecom” İlin Telekommunikasiya şirkəti adına layiq görülüb.

“AzerTelecom” Azərbaycanın, ümumilikdə isə Cənubi Qafqaz regionunun ən iri telekommunikasiya operatorlarından biridir və ölkənin ilk mobil operatoru və ən sürətli mobil internet provayderi olan “Bakcell” şirkətinin törəmə müəssisəsidir. “AzerTelecom” 2008-ci ildə təsis edilib və telekommunikasiya sektorunda yerli və xarici şirkətlərə müxtəlif qabaqcıl xidmətlər təqdim edir. “AzerTelecom” hazırda Azərbaycanın sahib olduğu Enerji və Nəqliyyat Mərkəzi statuslarına əlavə olaraq ölkənin Regional Rəqəmsal Mərkəzə çevrilməsi üçün “Azerbaijan Digital Hub” proqramını icra edir. Proqramın reallaşması ölkənin Milli İT və Milli İnnovasiya strategiyası üçün mühüm təməl yaradır və rəqəmsallaşmanın sürətlənməsinə, rəqəmsal iqtisadiyyata çevik transformasiyaya, start-apların, İT arxitekturasının inkişafına mühüm töhfə verəcəkdir. Proqram ümumilikdə ölkənin İKT sisteminin ən qabaqcıl dünya standartları səviyyəsinə çatdırılması, ölkənin beynəlxalq reytinqlərdə daha öncül sıralara çıxmasına şərait yaradacaqdır.