"Bacarıq yoxdursa, diplom sadəcə kağız parçasına çevrilir" - Nazir müavini

“İşəgötürən ilk növbədə insanın nəzəri biliklərini deyil, praktik bacarıqlarını qiymətləndirir”.

Ens.az xəbər verir ki, bu fikirləri elm və təhsil nazirinin müavini Firudin Qurbanov Elm və Təhsil Nazirliyi, Təhsil İnstitutu və Məktəbəqədər və Ümumi Təhsil üzrə Dövlət Agentliyinin təşkilatçılığı ilə keçirilən “BilBacar” müsabiqəsinin 2025/2026-cı tədris ili üzrə qaliblərinin mükafatlandırılması tədbirində səsləndirdi.

Onun sözlərinə görə, ən nüfuzlu ali məktəbi bitirmək mümkündür:

“Lakin işə qəbul zamanı namizədin bacarıqları yoxlanılır. Əgər həmin bacarıqlar yoxdursa, diplomun heç bir əhəmiyyəti qalmır və o, sadəcə kağız parçasına çevrilir. Bu gün əsas məsələ gənclərdə hansı bacarıqların formalaşdırılmalı olmasıdır. Dünyanın inkişafına nəzər saldıqda görürük ki, böyük uğurlar qazanan insanlar innovativ düşüncə və praktik bacarıqları ilə seçilirlər. Müasir dövrdə diqqət yetirilməli olan əsas məqam məhz yeni bacarıqların əldə edilməsidir".

Nazir müavini nümunə kimi dünyanın ən varlı insanlarından biri olan İlon Maskı göstərərək bildirdi ki, onun uğurunun əsasında innovativ ideyalar dayanır:

"İlon Maskın rəhbərlik etdiyi şirkətlər elektrik avtomobillərinin inkişafına öncüllük edib, hazırda isə kosmik texnologiyalar sahəsində fəaliyyət göstərirlər. Bu innovativ fəaliyyətlər ona böyük iqtisadi uğur qazandırıb”.