"Bakı Fəaliyyətə Çağırış": Azərbaycanın təcrübəsi müharibədən sonrakı bərpanın əhəmiyyətli nümunəsidir

Azərbaycanın işğaldan azad edilmiş ərazilərin bərpası üzrə təcrübəsi dünyada müharibədən sonrakı bərpanın əhəmiyyətli nümunələrindən biridir.

"Ens.Az" xəbər verir ki, bu barədə Ümumdünya Şəhərsalma Forumunun 13-cü sessiyasının (WUF13) yekunları üzrə qəbul edilmiş "Bakı Fəaliyyətə Çağırış"da deyilir.

Sənəddə humanitar cavab tədbirlərini, bərpanı və uzunmüddətli inkişafı özündə birləşdirən mənzil sahəsindəki kompleks yanaşmaların zəruriliyi vurğulanıb.

Qeyd edilib ki, ailələr, ayrı-ayrı şəxslər və məcburi köçkünlər tez-tez təhlükəli və ya yararsız mənzil şəraitində yaşamaq məcburiyyətində qalırlar, bu da sonrakı yerdəyişmə, təhlükə və sosial təcrid risklərini artırır.

Bununla əlaqədar olaraq, sənəd qeyri-sabit və münaqişədən sonrakı şəraitdə şəhərlərin iqlimə davamlı və insanyönümlü bərpasına, eləcə də inkişaf və iqlim sahəsində maliyyələşdirilməyə çıxışın genişləndirilməsinə çağırır.

Sənədin mətninə əsasən, milli və yerli hakimiyyət orqanları, humanitar və inkişaf təşkilatları, eləcə də beynəlxalq qurumlar yaşayış yerlərinin və kritik mülki infrastrukturun qorunmasını təmin etməli, yerdəyişmələrin və dağıntıların qarşısının alınması mexanizmlərini gücləndirməli və bu tədbirlərə səmərəli riayət olunmasına zəmanət verməlidirlər.

"Dünyada artıq müharibədən sonrakı bərpanın əhəmiyyətli nümunələri, o cümlədən ev sahibi olan ölkənin - Azərbaycanın təcrübəsi mövcuddur", - "Bakı Fəaliyyətə Çağırış"da bildirilib.

Sənəd həmçinin prioritet olaraq bərpa və yenidənqurmanı, gələcəkdə isə məcburi köçkünlərin öz evlərinə qayıdışını nəzərdə tutan əlaqələndirilmiş yanaşmaya çağırır.