Benzin mühərrikli avtomobillərin satışı 2035-ci ildən qadağan ediləcək

ABŞ-da Kaliforniya ştatının hakimiyyəti benzin mühərrikli yeni avtomobillərin satışını 2035-ci ildə qadağan edəcək. Ens.az SİA-ya  istinadən xəbər verir ki, bu barədə Kaliforniya qubernatoru Gevin Nyusom açıqlama verib və məlumat Twitter-də yayımlanıb.

"Uzun müddətdir ki, avtomobillərin uşaqlarımızın və yaxınlarımızın işlənmiş qazlarla nəfəs aldıqları havanı çirkləndirməsinə icazə verdik. Uşaqlarımızda astmaya səbəb olmayan avtomobillərə ehtiyacımız var", deyə qubernator bildirib.

Onun sözlərinə görə, Dövlət Hava Qoruma Şurası 2035-ci ilədək ştatda satılan bütün yeni avtomobillərin atmosferə karbon dioksid yaymasının qarşısını alan qaydaları hazırlayacaq və 2045-ci ilə kimi bu qaydalar orta və ağır yük daşıyan maşınlara şamil ediləcək. Qaydalar eyni zamanda yerli sakinlərinin benzinlə işləyən avtomobillərə sahib olmasını və ya istifadə edilmiş maşınlarını satmasını qadağan etməyəcək.

Xatırladaq ki, Kaliforniya ştatı ABŞ-da satılan avtomobillərin ümumi həcminin 11 faizini təşkil edən ən böyük avtomobil bazarıdır. Qubernatorun təşəbbüsü, planı real hesab etməyən avtomobil və neft şirkətlərinin etirazı ilə qarşılanıb.