BOKT-ların mənfəəti kəskin artıb – yarımildə 121 milyon manatı ötüb

Azərbaycanda fəaliyyət göstərən bank olmayan kredit təşkilatları (BOKT) 2026-cı ilin ilk yarısını 121.2 milyon manat xalis mənfəətlə başa vurub. Ens.az bu barədə Azərbaycan Mərkəzi Bankına istinadən xəbər verir.

Bu göstərici ötən ilin eyni dövrü ilə müqayisədə əhəmiyyətli yaxşılaşmanı əks etdirir. Belə ki, BOKT-lar 2025-ci ilin yanvar-iyun aylarını 13.2 milyon manat xalis zərərlə tamamlamışdı.

Hesabat dövründə sektorun gəlirləri 61% artaraq 351.2 milyon manata yüksəlib. Eyni zamanda, xərclər 5.4% azalaraq 141.5 milyon manat, xüsusi ehtiyatlara ayırmalar 1.7% artaraq 78.1 milyon manat, gözlənilməz xərclər isə 0.1 milyon manat təşkil edib. BOKT-ların mənfəət vergisi ödəmələri isə illik müqayisədə 94.3% artaraq 10.3 milyon manata çatıb.

2026-cı il iyulun 1-nə BOKT sektorunun aktivləri 58.6% artaraq 1 milyard 528.3 milyon manata yüksəlib. Aktivlərin 1 milyard 136.6 milyon manatını müştərilərə verilmiş xalis kreditlər təşkil edib. Son bir ildə BOKT-ların kredit portfeli 69.2% böyüyüb.

Hesabat tarixinə sektorun öhdəlikləri 63.6% artaraq 838.7 milyon manata, balans kapitalı isə 53% artaraq 689.6 milyon manata çatıb.