BOKT-lərin faiz dərəcələri dövlət tərəfindən tənzimlənə bilər?

Azərbaycan Mərkəzi Bankının (AMB) sədri Taleh Kazımov yaxın günlərdə etdiyi çıxışında Azərbaycanda bank olmayan kredit təşkilatlarının (BOKT) faizlərinin yüksək olmasının Mərkəzi Bankı daim narahat edən məsələlərdən biri olduğunu bildirib. Onun sözlərinə görə, məqsədlərdən biri də faiz dərəcələrinə təsir göstərmək və onları daha məqbul səviyyəyə gətirməkdir.

Bəs bu istiqamətdə hansı tədbirlər görülə bilər? BOKT-lərin faiz dərəcələri dövlət tərəfindən tənzimlənə bilərmi? Ümumiyyətlə, bu təşkilatların kredit faizlərinin yüksək olmasının səbəbi nədir?

Məsələ ilə bağlı Oxu.Az-a açıqlama verən deputat Vüqar Bayramov bildirib ki, BOKT-lərin faiz dərəcələrinə limit qoyulması məqsədəuyğun deyil:

"İstər banklar, istərsə də BOKT-lər üçün faizlərin dövlət tərəfindən tənzimlənməsi və yaxud faiz tavanının müəyyənləşdirilməsi nəzərdə tutulmur. Bu praktikadan çox az ölkədə istifadə olunur. Çünki BOKT-lər üçün limitlər müəyyənləşsə, digər kredit təklif edən subyektlərə, banklara da oxşar yanaşmanın tətbiq edilməsi gündəmə gələ bilər. Buna görə də limitin qoyulması məqsədəuyğun deyil".

Vüqar Bayramov BOKT-lərin faiz dərəcələrinin yüksək olmasının səbəblərini də açıqlayıb:

"BOKT-lərin əksəriyyəti vəsaitləri banklardan cəlb edirlər. Onların cəlb etdikləri vəsaitlər nisbətən bahalıdır. Bu da faizlərin yüksək olmasına səbəb olur. Həmçinin onların kredit şərtləri banklarla müqayisədə daha yüngüldür. Burada Mərkəzi Bank üçün əsas vasitə BOKT-lərin ucuz maliyyə resurslarına çıxış imkanlarının artırılmasıdır. Bu olarsa, nəticə etibarilə BOKT-lərdə faizlər aşağı düşə bilər".