“Bu tədbir türk dünyasının həmrəyliyinə xidmət edir” - Fariz İsmayılzadə

Bildiyimiz kimi, bu gün Heydər Əliyev Mərkəzində Birinci Türkoloji Qurultayın 100 illiyinə həsr olunmuş “Türk Dünyası Həftəsi”nin açılış mərasimi olub.

Redaktor.az-a danışan Milli Məclisin deputatı Fariz İsmayılzadə bildirdi ki, bu, çox önəmli tarixi hadisədir:

"Çünki biz həm öz irsimizə, həm də türk dünyasının həmrəyliyinə sadiqliyimizi nümayiş etdiririk. Bu tədbirin Bakıda keçirilməsi alimlərin, türk dünyasının ziyalılarının və siyasətçilərinin bir araya gəlməsi, 1926-cı ildə keçirilmiş mühüm qurultayın yenidən xatırladılması, gündəmdə saxlanılması və onun ideyalarının, missiyasının yenidən dünya ictimaiyyətinə çatdırılması deməkdir. Təbii ki, bu tədbir həm də bugünkü gündəliyimizə tam uyğundur – həm siyasi gündəliyimizə, həm də türk dünyasının birləşməsi ilə bağlı hədəflərimizə xidmət edir və xarici siyasətimizin prioritetləri ilə üst-üstə düşür. Bu baxımdan çox vaxtında təşkil olunmuş bir tədbirdir və cənab prezidentin türk dünyasına verdiyi töhfələrdən, türk dövlətlərinin birləşməsi istiqamətində atdığı mühüm addımlardan biridir. Eyni zamanda sevindirici haldır ki, bu təşəbbüs digər dövlətlər tərəfindən də dəstəkləndi və geniş iştirakla qarşılandı".