"Cavabımız sürətli və sarsıdıcı olacaq!" - Tehrandan Vaşinqtona sərt XƏBƏRDARLIQ

İranın Ali Liderinin hərbi müşaviri Möhsün Rzayi ABŞ-ni iki ölkə arasında imzalanmış anlaşma memorandumunun bəndlərini pozmaqda ittiham edib və Tehranın hər bir pozuntuya kəskin cavab verəcəyini bəyan edib.

Ens.az Redaktor.az-a istinadən xəbər verir ki,bu barədə məlumatı TASS agentliyi yayıb.

Məlumata görə, M. Rzayi rəsmi Vaşinqtonun müqavilə şərtlərinə əməl etmədiyini özünün sosial media hesabında kəskin şəkildə tənqid edib:

"Birləşmiş Ştatlar regiondakı proksi qüvvələrinin hərəkətlərini dəstəkləməklə (İsrailin Livandakı hərəkətlərinə istinad edərək) memorandumun birinci bəndini, Hörmüz boğazında gərginliyi artırmağa davam etməklə isə beşinci bəndini pozub. Memorandumun istənilən bəndinin pozulmasına cavab sürətli və sarsıdıcı olacaq".

Bildirilib ki, bu bəyanatdan bir gün əvvəl ABŞ Mərkəzi Komandanlığı (CENTCOM) Hörmüz boğazında ticarət gəmisinə edilən hücuma cavab olaraq İran ərazisinə hava zərbələri endirdiyini təsdiqləyib. Vaşinqtonun bəyanatına əsasən, ABŞ hərbi təyyarələri İranın raket və PUA anbarlarını, eləcə də sahil radar qurğularını hədəf alıb. İslam Respublikası isə öz növbəsində ABŞ-nin regiondakı hərbi bazalarına cavab zərbələri endirdiyini iddia edib.