CNN: "Donald Tramp İranla razılaşma barədə 37 dəfə açıqlama verib"

ABŞ Prezidenti Donald Tramp İranla razılaşma əldə etməyə yaxın olması barədə artıq 37 dəfə açıqlama verib.

Ens.az Oxu.az-a istinadən xəbər verir ki, bu hesablamanı CNN telekanalı aparıb.

"O, bunu ən azı 37 dəfə edib. Tramp sosial şəbəkədəki paylaşımlarında, ictimai çıxışlarında və kütləvi informasiya vasitələri ilə telefon danışıqlarında məhz bu qədər dəfə razılaşmanın yaxın olduğunu açıq şəkildə bildirib və ya İranın bunu imzalamağa can atdığını iddia edib", - deyə telekanal məlumat yayıb.

Qeyd olunub ki, bu fikir ilk dəfə martın 23-də səsləndirilib. Sonuncu dəfə isə ABŞ rəhbəri iyunun 8-də Vaşinqton və Tehranın "yaxın iki həftə ərzində razılığa gələcəyini" bəyan edib.

"Tramp bu barədə danışmağa davam edir, çünki o ya yanılır, ya maliyyə bazarlarını sakitləşdirməyə çalışır, ya da bunu həyata keçirə biləcəyinə inanır", - deyə açıqlamada qeyd olunub.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Həmçinin Hörmüz boğazından gəmilərin keçidində ciddi problemlər yaranıb.

Aprelin 8-də Donald Tramp Tehrana verdiyi ultimatumun vaxtının bitməsinə bir neçə saat qalmış Vaşinqtonun ikihəftəlik atəşkəslə razılaşdığını elan edib.

Daha sonra İslamabadda tərəflərin ilk görüşü keçirilib.

Aprelin 22-nə planlaşdırılmış ikinci görüş isə baş tutmayıb.

İyunun 7-də isə İsrail və İran yenidən qarşılıqlı zərbələr endirməyə başlayıblar.