CNN: İran və Omanın Hörmüzlə bağlı razılığa gəlmə şansları 50/50 nisbətindədir

ABŞ Prezidenti Donald Trampın İran və Oman arasında Hörmüz boğazı üzrə razılaşmanın tezliklə əldə olunacağı barədə bəyanatlarına baxmayaraq, cümə günü baş tutacaq danışıqlarda razılaşmaya nail olma ehtimalı 50/50 nisbətində qiymətləndirilir.

"Ens.az" “Report”a istinadla  xəbər verir ki, bu barədə CNN-ə Fars körfəzi ölkələrinin birindən olan yüksəkvəzifəli mənbə bildirib.

Onun sözlərinə görə, İran nümayəndə heyətinin tərkibinə İslam İnqilabı Keşikçiləri Korpusunun (SEPAH) nümayəndələri daxil deyil. Mümkün müvəqqəti razılaşmanın detallarının təsdiqlənməsi üçün onun razılığı tələb olunacaq.

Öz növbəsində, "Axios" portalının mənbələri bildiriblər ki, ABŞ, İran və Oman Hörmüzlə bağlı razılaşma əldə etməyə yaxınlaşıb. Onların sözlərinə görə, razılaşma müvəqqəti xarakter daşıyacaq və 60 gün qüvvədə olacaq. Onun şərtlərinə əsasən, kommersiya gəmiləri boğaza şimal marşrutu - İran suları vasitəsilə daxil olacaq, çıxış trafiki isə cənub yolu - Oman vasitəsilə təmin ediləcək. Bununla yanaşı, "Axios"un mənbələri iddia edirlər ki, 60 günlük müddət ərzində tranzit haqqı və digər rüsumlar tutulmayacaq. Tərəflər həmçinin İranın blokladığı boğaz bölgələrinin minalardan təmizlənməsinə 30 gün ərzində başlamaq öhdəliyi götürürlər.