Deputat: "Ermənistan Konstitusiyası dəyişməzsə, iki ölkə arasında sülh imzalanmayacaq"

"Prezident İlham Əliyevin qəti mövqeyi ondan ibarətdir ki, Ermənistan Konstitusiyası dəyişməzsə, iki ölkə arasında sülh imzalanmayacaq".

Ens.az Oxu.az-a istinadən xəbər verir ki, bunu Milli Məclisin bu gün keçirilən iclasında deputat Nizami Səfərov deyib.

O, bildirib ki, qonşu ölkənin konstitusiyası dəyişməsi yönündə Paşinyan da bəyanatla çıxış edib:

"Ermənistan konstitusiyasının dəyişməsi yönündə Paşinyan da bəyanat verdi. O bildirib ki, 2026-cı il parlament seçkilərindən sonra bu işi həyata keçirmək olar. Bundan başqa, Minsk Qrupunun ləğvi də tələb olunur. Onların varlığına ehtiyac yoxdur. Azərbaycan tərəfinin israr etdiyi digər mühüm tələb ATƏT-in Minsk qrupunun ləğv edilməsidir.

Tarixə qovuşan münaqişənin həlli üçün yaradılan və otuz ilə yaxın bir müddətdə fəaliyyət qabiliyyətsizliyini nümayiş etdirən bir qurumun mövcudluğuna ölkəmizin ərazi bütövlüyü və suverenliyinin bərpasından sonra heç bir ehtiyac yoxdur".

"Azərbaycan tərəfinin beynəlxalq hüquqa və mövcud geosiyasi reallıqlara əsaslanan mövqeyi birmənalı olaraq nümayiş etdirir ki, dövlətimiz Cənubi Qafqaz regionunda davamlı sülhün və beynəlxalq təhlükəsizliyin bərqərar olunması üçün ardıcıl fəaliyyətini davam etdirir və şübhəsiz ki, ölkəmizin səyləri öz müsbət nəticələrini yaxın zamanlarda verəcək", - deyə deputat qeyd edib.