Deputat tarixə düşən 100 qadını təqdim etdi

Tovuz rayonunun Qovlar şəhərində yerləşən Gənclər Evində millət vəkili Qənirə Paşayevanın müəllifi olduğu “Tarixə adını yazan Qadınlar” üç cildliyinin yeni nəşrinin imza günü keçirilib.

Kult.az xəbər verir ki, millət vəkili kitabın məziyyətlərindən, orada haqqında yazılar verilmiş məşhur azərbaycanlı qadınlardan söz açıb.

O, Azərbaycan Respublikasının Birinci vitse-prezidenti, Heydər Əliyev Fondunun Prezidenti, UNESKO və İSESKO-nun xoşməramlı səfiri Mehriban Əliyeva haqqında da danışıb:

“Biz çox şadıq ki, dünyanın ən tanınmış qadınları arasında bizim soydaşlarımız və çağdaşlarımız da var. Mehriban xanımın istər ölkə daxilində, istərsə respublikamızın hüdudlarını aşan humanitar fəaliyyəti, mədəniyyətə xüsusi qayğısı özlüyündə bir qürur mənbəyidir. Mədəniyyətlər və dinlərarası dialoq, idmanın və gənclər hərəkatının inkişafı, xüsusi qayğıya ehtiyacı olanlara şəfqətlə yanaşma, ədalətli sülhün, tolerantlığın təbliği, belə nümunələrin yaradılması sahəsində gördüyü böyük və önəmli işləri xüsusi vurğulamaq istəyirəm”.

Q.Paşayeva kitabında yer alan 100 qadın içərisində Azərbaycanın, türk və müsəlman dünyasının tarixdəki məşhur qadınları - Tomris, Sara xatun, Həzrəti Xədicə ilə bağlı məlumatlar olduğunu söyləyib.

Tədbirdə çıxış edən Tovuz rayon İcra Hakimiyyətinin başçısı Məmməd Məmmədov Qənirə Paşayevaya belə bir ensiklopedik kitab yazdığına görə təşəkkür edib. İcra başçısı millət vəkilinin 100 qadın haqqında məqalələrinin hər birini özünəməxsus ştrixlərə, fərqliliyə malik portret yazısı adlandırıb.

Qardaş Türkiyənin tanınmış yazıçısı və jurnalisti Məryəm Aybikə Sinan çıxış edərək, kitabda türk dünyası qadınlarına geniş yer verilməsinin önəmini vurğulayıb.

Tədbirin sonunda Q.Paşayeva kitablarını imzalayaraq, tədbir iştirakçılarına hədiyyə edib.