Deputatdan təklif: "Elektron nəzarət mexanizmi yaradılsın"

"Pulsuz hüquqi yardım haqqında" qanun layihəsi mühüm və sosial əhəmiyyətli təşəbbüsdür. Xüsusilə aztəminatlı və həssas qrupların hüquqi yardıma çıxış imkanlarının genişləndirilməsi mühüm addımdır. Müsbət məqamlardan biri də vətəndaşın vəkil və ya vəkil qurumunu seçmək, ondan imtina etmək hüququnun nəzərdə tutulmasıdır. Eyni zamanda, vətəndaşın iş üzrə zəruri sənədləri və məlumatları təqdim etmək və prosesin əsassız uzadılmasına yol verməmək öhdəliyi müəyyən edilir".

Ens.Az xəbər verir ki, bunu Milli Məclisin Əmək və sosial siyasət komitəsinin bu gün keçirilən iclasında deputat Nigar Məmmədova deyib.

O, elektron nəzarət mexanizminin yaradılmasını təklif edib:

"Əslində hər bir iş üzrə elektron kabinet olmalıdır. Orada müraciət, vəkilin müəyyən edilməsi, müqavilə, göstərilən xidmətlər, iş üzrə sərf olunan vaxt, təqdim olunan sənədlər və görülmüş işlər barədə məlumatlar təhlükəsiz şəkildə əks olunmalıdır. Vətəndaşın da iş başa çatdıqdan və ya müəyyən mərhələ tamamlandıqdan sonra vəkilin fəaliyyəti barədə rəy bildirmək imkanı olmalıdır. Eyni zamanda, vəkil də öz növbəsində vətəndaşın sənədləri təqdim etməməsi, əlaqəyə çıxmaması və ya digər halları sistemdə qeyd edə bilməlidir. Mən hesab edirəm ki, məqsədimiz sadəcə vətəndaşı pulsuz vəkillə təmin etmək olmamalıdır. Məqsədimiz keyfiyyətli, davamlı, şəffaf və məsuliyyətli hüquqi yardım sistemi yaratmaq olmalıdır".

"Ona görə təklif edirəm ki, layihənin tətbiqi mexanizmlərində elektron müraciət, vəkilin seçilməsi və dəyişdirilməsi, göstərilən xidmətlərin uçotu, vətəndaşın rəyi və şikayəti, vəkilin isə öz mövqeyini və görülmüş işləri sistemdə əks etdirməsi imkanları ayrıca nəzərdə tutulsun. Çünki dövlət vətəndaşın hüququnu qoruyursa, vətəndaş da bu sistemə, vəkil isə öz peşə məsuliyyətinə güvənməlidir. Mənim əsas təklifim məhz bu qarşılıqlı məsuliyyət və şəffaflıq mexanizminin gücləndirilməsidir", - deyə deputat əlavə edib.