Donald Tramp ABŞ və İran arasındakı sülh razılaşmasının yeni mərhələsini elan etdi

"ABŞ və İran sülh yolu ilə nizamlanma üzrə razılaşmaların icrasının ikinci mərhələsinə qədəm qoyur".

Ens.az Oxu.az-a istinadən xəbər verir ki, bu barədə ABŞ Prezidenti Donald Tramp Fransada "Böyük Yeddilik" toplantısı çərçivəsində Qətər əmiri Şeyx Təmim bin Həməd Al Tani ilə görüşündə bildirib.

"İranla müqavilə bağlamışıq. O, uğurlu olmalıdır. Hazırda ikinci mərhələyə keçilir və düşünürəm ki, bu, daha asan başa gələcək", - deyə Amerika lideri Fransada keçirilən "Böyük Yeddilik" (G7) sammiti çərçivəsində jurnalistlərə qeyd edib.

Tramp İranla hazırlanan razılaşmanı ədalətli və yaxşı sənəd kimi xarakterizə edib. ABŞ prezidenti vurğulayıb ki, İslam Respublikası ilə imzalanan memorandum çərçivəsində Vaşinqton İrana sərmayə yatırmaqla bağlı heç bir öhdəlik götürmür.

"İrana heç bir vəsait yatırmırıq. Dünən yayılan şayiələr sadəcə gülüncdür. Bizim, mənim və ya başqa birinin istəyi olarsa, nə vaxtsa müdaxilə edib nəsə etmək hüququmuz var, lakin biz heç bir pul qoymuruq. İran iqtisadiyyatına investisiya ilə bağlı öhdəliyimiz yoxdur", - deyə o bildirib.

Tramp həmçinin onu da qeyd edib ki, müqavilə çərçivəsində İrana nüvə silahına sahib olmaq qadağan ediləcək, əks halda rəsmi Tehran ağlasığmaz nəticələrlə üzləşəcək.

"İran heç vaxt nüvə silahına malik olmayacaq. Onlar bunu hazırlamayacaq, almayacaq və onunla heç nə etməyəcəklər. Əgər nəsə etmək istəsələr, inanılmaz dərəcədə ağır nəticələrdən əziyyət çəkəcəklər. Məhz bu səbəbdən razılaşmanı imzalamağa razılaşdım", - deyə Amerika lideri Fransadakı G7 sammitində jurnalistlərə söyləyib. Bununla belə, o, konkret olaraq hansı nəticələrdən söhbət getdiyini dəqiqləşdirməyib.

ABŞ Prezidenti ölkəsinin İranın nüvə materiallarını əldə etməyi planlaşdırdığını da diqqətə çatdırıb.

"Biz gedib İranın nüvə materiallarını götürməyə hazırlaşırıq. Bu materiallar o qədər də qiymətli deyil, lakin hesab edirəm ki, psixoloji cəhətdən biz onlara sahib olmaq istəyirik", - deyə o əlavə edib.

Tramp İranla münaqişənin artıq arxa plana keçdiyini və ABŞ-nin diqqətini Ukraynadakı vəziyyətin nizamlanmasına yönəldəcəyini vurğulayıb.

ABŞ-nin bundan sonra Ukrayna böhranının həllinə fokuslanıb-fokuslanmayacağı ilə bağlı sualı cavablandıran dövlət başçısı deyib:

"Bütün diqqətimiz İranda idi, indi bu məsələ ikinci plana keçir".

Tramp Vaşinqtonun Ukraynada baş verənlərlə heç bir əlaqəsi olmadığını iddia etsə də, münaqişənin həlli üçün əlindən gələni edəcəyini bildirib. Birləşmiş Ştatların rəhbəri Ukraynada münaqişənin sülh yolu ilə həlli istiqamətində bütün imkanlarını səfərbər edəcəyini deyib.

"Mən səkkiz müharibəni nizamlamağa nail olmuşam. Düşünürdüm ki, bunu həll etmək ən asanı olacaq. Bəli, bacardığım hər şeyi edəcəyəm", - deyə ABŞ lideri sözlərini yekunlaşdırıb.