DOST Agentliyi səkkiz rayonda inzibati binaların təmirinə yeddi milyon manat ayırdı

Dayanıqlı və Operativ Sosial Təminat (DOST) Agentliyi ölkənin bir neçə regionunda yerləşən inzibati binalarının əsaslı təmiri ilə bağlı üç satınalma müsabiqəsi elan edib.

Ens.Az xəbər verir ki, tender müsabiqələrin ümumi ehtimal olunan dəyəri 7 milyon 265 min 869 manat təşkil edir.

Agentliyin Xaçmaz və Qusar şəhərlərində yerləşən inzibati binalarının əsaslı təmiri üzrə elan olunan tenderin ehtimal olunan qiyməti 2 milyon 180 min 403 manat təşkil edir.

Salyan rayonu, Hacıqabul rayonu və Biləsuvar şəhəri ünvanlarında yerləşən DOST Agentliyinin balansında olan inzibati binaların əsaslı təmiri üçün elan olunan müsabiqənin ehtimal olunan qiyməti 2 milyon 414 min 677 manat müəyyən edilib.

Eyni zamanda, agentliyin Qax, Zaqatala və Qəbələ şəhərlərində yerləşən inzibati binalarının əsaslı təmiri üzrə keçirilən digər müsabiqə üzrə ehtimal olunan qiymət isə 2 milyon 670 min 789 manat təşkil edir.

Tenderlərin şərtləri açıqlanmayıb.

Müsabiqələrə gələn il yanvarın 9-da yekun vurulacaq.