Dövlət istiqrazları üzrə faiz ödənişlərinin həcmi açıqlanıb

2026-cı ilin birinci yarımilində dövlət istiqrazları üzrə faiz və diskont ödənişlərinə 275.9 milyon manat vəsait yönəldilib.

Ens.Az xəbər verir ki, bu barədə Maliyyə Nazirliyinin "2026-cı ilin I yarımili üzrə dövlət borcu və dövlət zəmanətli borca dair Statistik Bülleten"ində qeyd olunub.

Məlumata görə, hesabat dövründə dövlət istiqrazları üzrə vaxtı çatmış 1 milyard 971.9 milyon manat əsas borc investorlara qaytarılıb. Eyni zamanda daxili maliyyə bazarında 200 milyon manat həcmində yeni dövlət istiqrazları yerləşdirilib.

İyulun 1-nə dövriyyədə olan dövlət qiymətli kağızlarının ümumi həcmi 7 milyard 234.6 milyon manat təşkil edib. Onların 51.6 faizi 5 ilədək, 48.4 faizi isə 5 il və daha uzunmüddətli istiqrazların payına düşür.