Ermənistanın müdafiə naziri: "Saxlanılan Azərbaycan əsgəri diversant deyil"

"Azərbaycanlı əsgər saxlanılma zamanı heç bir müqavimət göstərməyib".

Oxu.Az erməni KİV-ə istinadən xəbər verir ki, bu barədə oktyabrın 7-də parlamentdəki hökumət saatında Ermənistanın müdafiə naziri Suren Papikyan açıqlama verib.

"Bu amilin özü onun diversant olmadığını göstərir", - deyə nazir bildirib.

Papikyanın sözlərinə görə, səlahiyyətli orqanlar insident barədə məlumat əldə etdikdən sonra zəruri tədbirlər görülüb, eləcə də axtarış əməliyyatları aparılıb.

"Azərbaycan əsgəri ilə bağlı müfəssəl məlumatı yalnız xidməti araşdırma və istintaq hərəkətləri başa çatdıqdan sonra vermək mümkün olacaq", - deyə o qeyd edib.

Xatırladaq ki, oktyabrın 1-i yerli vaxtla saat 14:15-də (Bakı vaxtı ilə eyni - red.) Azərbaycan hərbçisi Nəsimi Musayev Ermənistanın təhlükəsizlik xidmətləri tərəfindən saxlanılıb. Məlum olmayan şəraitdə Zəngəzurun Şəki kəndi istiqamətində sərhəd xəttini keçən hərbi qulluqçu barəsində iki ay müddətinə həbs qərarı çıxarılıb.