G7 sammiti: Tramp İran məsələsindəki yardıma qarşılıq Ukraynaya dəstək sözü verib

ABŞ Prezidenti Donald Tramp "Böyük yeddilik" (G7) sammitində İran məsələsində kömək almaq üçün Avropa liderləri ilə ortaq məxrəcə gəlib və buna cavab olaraq Ukraynaya yardım edəcəyinə söz verib.

Ens.az Oxu.az-a istinadən xəbər verir ki, bu barədə "Politico" nəşri Avropa diplomatlarına istinadən məlumat yayıb.

Məlumata görə, Tramp həmkarlarına təzyiq göstərərək onların İranla sazişi dəstəkləməsini istəyib. Həmçinin ABŞ-nin vitse-prezidenti Cey Di Vens Tehranla razılaşma bağlamaq üçün Cenevrəyə gəlməmişdən əvvəl Hörmüz boğazının minalardan təmizlənməsi prosesinə yardım təklif etmələrini istəyib.

Mətbuat nümayəndələrinə verdiyi müsahibədə ABŞ lideri Avropanın verəcəyi dəstəyin əhəmiyyətini kiçildərək "böyük bir yardıma ehtiyac qalmayacağını" bildirib. Ancaq mətbuata qapalı keçirilən görüşlərdə Donald Tramp İranla razılaşma məsələsində həm şifahi, həm də maliyyə köməyi istəyib.

Nəşrin məlumatlı mənbəsi qeyd edib: "Bunun əvəzində Ukrayna üçün də müəyyən addımlar atılmalıdır. Hər kəs onun Ukraynaya yardım edəcəyini düşünür. O, liderlərlə məhz bu barədə danışıb".

Öz növbəsində, G7 dövlətlərinin rəhbərləri yalnız konkret şərtlər çərçivəsində dəstək verməyə razı olduqlarını vurğulayıblar.

Məlumatda o da bildirilir ki, Fransa Prezidenti Emmanuel Makron minalardan təmizləmə əməliyyatları üçün gəmilərin cəlb edilməsinin ABŞ, eləcə də prosesin iştirakçıları olan İran və Omanın birgə tələbi və razılığı ilə həyata keçirilməsinin vacibliyini diqqətə çatdırıb.