Harri Kasparov: “Müharibə artıq real fəlakətə doğru gedir”

“Ukraynada baş verən savaş bizi real fəlakətə doğru aparır”.

Ens.az Musavat.com-a istinadən xəbər verir ki, bu fikir Putin rejiminin qatı müxalifi, şahmat üzrə keçmiş dünya çempionu Harri Kasparovun "Azadlıq" radiosunun əməkdaşı Maksim Sokolova müsahibəsində səslənib.

“Bu gün Rusiyada vəziyyət donma nöqtəsindədir. Kremlin malik olduğu güc resurslarına görə Rusiyanın Ukraynada yekun məğlubiyyətinə qədər Putinin hakimiyyətinə təhlükə yarada biləcək hansısa ciddi etirazdan danışmaq sadəcə mənasızdır. Təbii ki, biz həqiqəti çatdırmağa çalışmalıyıq, informasiyanın ötürülməsi üçün bütün mümkün kanallardan istifadə etməliyik. Lakin rejim informasiya məkanına tam nəzarət edir. Həqiqətən də kütləvi etirazdan danışırıqsa, Rusiya cəmiyyəti ancaq qaçılmaz hərbi məğlubiyyət qarşısında oyana bilər”, - deyə Kasparov bildirib.

Keçmiş çempion savaşın getdikcə Rusiya üçün daha fəlakətli nəticələrə gətirib çıxaracağını iddia edib.

“Düşünürəm ki, Si Cinpinin səfərinin hekayəsi, Putinin Çinə etdiyi aşkar güzəştlər, virtual təslimçilik, yaşayış səviyyəsinin ümumi pisləşməsi - bütün bunlar əslində Rusiya cəmiyyətinə müharibənin dalana dirəndiyini nümayiş etdirmək imkanı verir. Müharibə bir fəlakətdir, buna görə dəyişikliklər lazımdır. Sadəcə insanlar bu müharibənin əsl fəlakətə gətirib çıxaracağını başa düşməlidirlər, çünki Rusiya uduzacaq. Bununla bağlı Rusiya tarixində çox nümunələr var”,-deyə Kasparov söyləyib.