Hörmüz boğazının açılması böhranı bitirməyəcək - BMT-dən XƏBƏRDARLIQ

Neft və taxıl tədarükündə yaranan fasilələrin həssas ölkələr üçün nəticələrinin Hörmüz boğazının açılması ilə bitməyəcəyi, əksinə uzunmüddətli davam edəcəyi bildirilir.

Ens.az Redaktor.az-a istinadən xəbər verir ki, bu barədə BMT-nin Ticarət və İnkişaf üzrə Konfransı (UNCTAD)  məlumat yayıb.

Hesabatda qeyd olunur ki, ərzaq təchizatı və nəqliyyat sistemlərinin bərpası enerji bazarlarının bərpasından daha uzun çəkə bilər. Buna səbəb kimi 100 gündən artıq davam edən ciddi gəmiçilik pozuntularından sonra təchizat zəncirlərinin yenidən uyğunlaşdırılmasının vaxt aparması göstərilir.

BMT tərəfindən 61 həssas iqtisadiyyat təhlil edilib və Hörmüz boğazındakı fasilələr və neft və taxıl idxalında qiymət şokları riskləri qiymətləndirilib. UNCTAD-ın məlumatına görə, ərzaq qiymətlərində 5 faiz artım uşaqlar arasında qida çatışmazlığı riskini yüksəldə bilər. Qeyd edək ki, bundan əvvəl ABŞ və İranın 1 iyul tarixində Qətərdə Hörmüz boğazı ilə bağlı dolayı danışıqlar aparacağı barədə məlumat yayılmışdı.

Eyni zamanda bildirilir ki, 18 iyunda ABŞ və İran arasında 60 gün müddətinə nəzərdə tutulmuş müvəqqəti anlaşma memorandumu imzalanıb. Lakin bir neçə gün sonra ABŞ Prezidenti İranı Hörmüz boğazında atəşkəs rejimini pozmaqda ittiham edib.