İçərişəhər ərazisində bayram ab-havası hökm sürür

 Bütövlükdə respublikamızın ərazisində olduğu kimi, “İçərişəhər" Dövlət Tarix-Memarlıq Qoruğu İdarəsi ərazisində də bayram ab-havası hökm sürür.

AZƏRTAC xəbər verir ki, idarə Yeni il sevincinə öz töhfəsini verərək, tarixi məkanda bayram əhval-ruhiyyəli günləri daha da yaddaqalan etmək məqsədilə Azərbaycan Dövlət Mədəniyyət və İncəsənət Universiteti (ADMİU) ilə birgə “Sərvətimiz” adlanan layihəni həyata keçirir.

İdarənin dəstəyi və ADMİU-nun baş müəllimi Gülnaz Mədətovanın rəhbərliyi ilə Rəssamlıq fakültəsinin tələbələri milli mədəni və təbii irsimizin möhtəşəm nümunələrini ənənəvi Yeni il ağaclarının üzərində fərqli yaradıcılıq formatında tərtib ediblər. Səkkiz stilizə edilmiş küknar İçərişəhərin mərkəzi nöqtələrindən birində, Qız qalası yaxınlığındakı meydanda quraşdırılıb.

Xarıbülbül, Qobustan, musiqi alətlərimiz, nar, şəbəkə sənəti, unikal xalça incilərimiz, Malıbəyli, Qımıl, Şaddə tələbələrin təqdimatında yeni bədii nəfəs alaraq canlandırılıb. Layihə çərçivəsində Teyyub İsgəndərzadənin “Xarıbülbül”, Fidan Cəfərovanın “Qımıl-Nar Bağı”, Ziyafət Kazımovanın “Şəbəkə”, Zöhrə Babayeva və Günel İskəndərovanın “Nar İslimi”, Nərmin Süleymanova və Zümrüd Musayevanın “Qobustan”, Əsmər Məmmədovanın “Malıbəyli” kompozisiyaları yerləşdirilib. Tariximizi, bu günümüzü və gələcəyimizi əks etdirən maraqlı kompozisiyalar hər kəsin könlünü oxşayacaq.