İran BMT-ni ölkədə iğtişaş törədənlərin cinayətlərini pisləməyə çağırdı

İran Birləşmiş Millətlər Təşkilatını (BMT) ölkədə baş verən iğtişaşlar zamanı hüquq-mühafizə orqanlarının əməkdaşlarına və dinc əhaliyə qarşı törədilən cinayətləri pisləməyə çağırıb.

Ens.az Teleqraf.az-a istinadən xəbər verir ki,bu barədə İranın xarici işlər naziri Abbas Əraqçi BMT-nin baş katibi Antoniu Quterreşlə telefon danışığı zamanı bildirib.

Nazirin sözlərinə görə, hüquq-mühafizə orqanlarının əməkdaşlarına və sadə vətəndaşlara qarşı törədilən qətllər, qadın və uşaqların öldürülməsi, insanların yandırılması, xəstəxana və tibbi mərkəzlərə hücumlar, çoxsaylı təcili tibbi yardım və yanğınsöndürən avtomobillərinin yandırılması, eləcə də məscidlərin və mədəniyyət mərkəzlərinin dağıdılması terrorçuluq xarakteri daşıyır. Əraqçi bu hərəkətləri “İslam Dövləti” terror qruplaşmasının metodlarına bənzədib və BMT-dən bu cinayətləri açıq şəkildə pisləməyi tələb edib.

O, həmçinin ABŞ və İsrail hakimiyyətlərini İrana qarşı hərbi təcavüzdə iştirak etməkdə ittiham edərək, son iğtişaşlar zamanı silahlı qruplar tərəfindən yüzlərlə iranlının öldürülməsinə görə məsuliyyət daşıdıqlarını bildirib. Əraqçinin sözlərinə görə, bu ölkələr BMT Təhlükəsizlik Şurasında iclas keçirməklə öz məsuliyyətlərini gizlədə bilməzlər.