İranın ABŞ-yə yeni təklifi bəlli oldu

Bu həftə üçüncü tərəflərin vasitəçiliyi ilə keçirilən görüş zamanı Tehran ABŞ rəsmilərinə öz yeni təklifini təqdim edib.

“Ens.Az” “Oxu.Az”a istinadən xəbər verir ki,bu barədə "The Washington Post" nəşri İranın xarici işlər naziri Abbas Əraqçıya istinadən məlumat yayıb.

Nəşr BMT Baş Assambleyası çərçivəsində jurnalistlər və ekspertlər qrupuna açıqlama verən Əraqçının bu sözlərini sitat gətirir:

"İran Tramp administrasiyasına Hörmüz boğazının yenidən açılmasını və genişmiqyaslı müharibənin dayandırılmasına dair danışıqların yeddi gün ərzində bərpa olunmasını nəzərdə tutan təklif verib".

İran XİN rəhbərinin sözlərinə görə, təqdim edilən bu təşəbbüs tərəflərin iyun ayında razılaşdırdığı anlaşma memorandumuna bənzəyir. Həmin sənədə əsasən, danışıqların bərpası və boğazın yenidən açılması üçün ABŞ yeddi gün ərzində konkret şərtləri yerinə yetirməlidir.

Bununla yanaşı, ABŞ-nin şərtləri yerinə yetirməsi üçün nəzərdə tutulan yeddi günlük müddət Vaşinqton İranın təklifi ilə razılaşdığı gündən sonrakı gün başlayacağı bildirilir.

İranın xarici siyasət idarəsinin rəhbəri bildirib ki, onlar hazırda Vaşinqtonun cavabını gözləyirlər.

Əraqçı qeyd edib ki, Tehran tələsmir, lakin ABŞ-nin razılaşması və noyabrın əvvəlində ABŞ Konqresinə keçiriləcək aralıq seçkisinə qədər danışıqların bərpa olunması daha yaxşı addım olardı.

Eyni zamanda, adının açıqlanmasını istəməyən ABŞ-li rəsmi jurnalistlərə bildirib ki, Birləşmiş Ştatlar "üçüncü tərəflərin vasitəçiliyi ilə müsbət və konstruktiv danışıqlar" aparır.

"ABŞ Hörmüz boğazına nəzarət edərək çox güclü mövqedədir, ona görə də biz tələsmirik. Ötən gecə təxminən 22 milyon barel neft boğazdan keçirilib", - deyə rəsmi vurğulayıb.