İrlandiyaya riskli uçuş: Trampın təyyarəsində zəruri təhlükəsizlik avadanlıqları çatışmır

ABŞ Prezidenti Donald Trampın gələn həftə İrlandiyaya səfəri üçün yeni "Boeing 747" təyyarəsindən istifadə edəcəyi planlaşdırılır. Lakin bu hava gəmisinin zəruri təhlükəsizlik avadanlıqları ilə tam təmin olunmaması barədə ciddi narahatlıqlar mövcuddur.

Oxu.Az xəbər verir ki, bu barədə "The Washington Post" məlumat yayıb.

Qəzetin yazdığına görə, onilliklər ərzində dövlət başçıları bütün mühafizə sistemlərinə malik, gücləndirilmiş "Boeing 747-200B" təyyarələrindən istifadə ediblər. Buna baxmayaraq, Tramp Qətər tərəfindən bağışlanmış yeni "Boeing 747" laynerini seçir. Birləşmiş Ştatlar artıq bu yeni təyyarənin təchizatına 400 milyon dollar xərcləyib.

ABŞ Administrasiyası qarşıdakı aylarda daha nə qədər vəsaitin ayrılacağı barədə məlumat vermir. Nəşr qeyd edir ki, təhlükəsizlik sistemlərinin quraşdırılması işləri bu payız baş tuta bilər, lakin Ağ Ev hələlik müvafiq planı açıqlamayıb. İşlərin noyabrda Konqresə keçiriləcək aralıq seçkidən sonra icra olunması da istisna edilmir.

Hələ iyul ayında "The New York Times" qəzeti Trampın yeni təyyarəsinin raket təhlükələrindən qorunma sistemi ilə təchiz olunmadığını, bu səbəbdən Ankarada keçirilən NATO sammitindən qayıdarkən köhnə təyyarədən istifadə etdiyini yazmışdı. Daha sonra həmin məqaləyə görə nəşrin bir neçə jurnalisti məhkəməyə çağırılmışdı.