İsraildə İranın nüvə proqramını irəlilətmək üçün ABŞ ilə danışıqlardan istifadə etdiyini düşünürlər

İsraildə İranın ABŞ ilə memorandumda nəzərdə tutulmuş 60 günlük danışıqlar dövründən öz nüvə ambisiyalarını daha da irəli aparmaq və atom silahının yaradılması sahəsindəki fəaliyyətini genişləndirmək üçün istifadə edə biləcəyindən ciddi narahatlıq keçirirlər.

Ens.az Report.az-a istinadən xəbər verir ki,bu barədə yerli yüksəkvəzifəli məmurlara istinadən İsrailin 12-ci telekanalı məlumat yayıb.

Məlumata görə, İranın ali rəhbəri Müctəba Xamenei ABŞ ilə yekun nüvə sazişinə nail olmaq barədə real niyyətə malik deyil. İsrailin müdafiə idarəsinin nümayəndələri isə, öz növbəsində, telekanala bildiriblər ki, Tehran prosesi qəsdən uzadacaq və danışıqlar üçün ayrılmış 60 gün əhəmiyyətli dərəcədə daha uzun müddətə çevriləcək.

Bununla yanaşı, telekanalın mənbələri vurğulayıblar ki, həm ABŞ Prezidenti Donald Tramp, həm də İran tərəfi bir-birini təkzib edən bəyanatlar səsləndirdiyi üçün hazırda Vaşinqton ilə Tehran arasındakı anlaşma memorandumunun dəqiq məzmunu qeyri-müəyyən olaraq qalır.

Bu kontekstdə mənbələr İran rəsmilərinin əldə olunmuş razılaşmanın Tehrana İran ərazisində zənginləşdirilmiş uranın saflaşdırılması ilə bağlı müstəqil qərar qəbul etmək hüququ verdiyinə dair iddialarına xüsusi diqqət yetirirlər.

Sazişin şərtlərini təhlil edən İsrail mütəxəssisləri İranın nüvə proqramı probleminin real şəkildə tənzimlənməsi imkanına bariz skeptisizmlə yanaşıblar. Telekanal qeyd edib ki, ekspertlərin böyük hissəsi ABŞ-nin keçmiş prezidenti Barak Obama dövründə nüvə proqramının məhdudlaşdırılmasına dair bağlanmış sazişin atom bombasının yaradılmasına yol verilməməsi üçün daha ciddi təminatları nəzərdə tutduğu barədə rəy bildirib.

Xatırladaq ki, Ağ Ev rəhbəri Donald Tramp ABŞ və İranın müqavilə bağladığını iyunun 15-də açıqlayıb.

Eyni gün Pakistanın Baş naziri Şahbaz Şərif ABŞ və İran arasında razılaşmanın əldə olunduğunu bildirib. Onun sözlərinə görə, sənədin iyunun 19-da İsveçrədə imzalanması planlaşdırılır.